Portada Conceyos Cueru, en Candamu, acueye la Xornada “Cultura alredor del vinu”

Cueru, en Candamu, acueye la Xornada “Cultura alredor del vinu”

by redacción asturnews

El Serviciu de Normalización Llingüística de Candamu organiza «Cultura alredor del vinu» en Cueru (Candamu) el próximu vienres 16 de marzu. Nesta xornada va tratase’l tema del vinu como ún de los atractivos culturales ya sociales del conceyu ya va sirvir de puesta en valor de la tradición vitivinícola na zona.

La xornada va empezar a las 19:30 nel Centru Social de Cueru, onde va haber una mesa redonda con títulu «El vinu de Candamu ya la redolada», au van participar espertos ya espertas na materia como Loli Loureiro (doctora en Ciencias Biolóxicas ya investigadora responsable del Plan Esperimental pal Desarrollu de la Vitivinicultura n’Asturias.), Javier Fernández Conde (catedráticu d’Hestoria Medieval), Manuel Ángel López (responsable de Viveros Candamo ya espertu nel desarrollu vitivinícola actual de Candamu) ya Beatriz Pérez (presidenta de la DOP de Cangas del Narcea ya responsable de la Bodega Vidas). Nesta mesa redonda va falase de las esperiencia n’outros sitios d’Asturias respecto al vinu, va esplicase la tradición vinera del conceyu de Candamu ya va cuntase cómo se ta trabayando actualmente la recuperación de las cepas.

Esa mesma tarde, n’acabando la mesa redonda, va haber un conciertu del grupu Tuenda (Pepín de Muñalén, Elías García ya Xosé Ambás) nel Chigre Ca Libertá, tamién en Cueru, a las 21:30 de nueche.

Tanto l’actu nel Centru Social como’l concertu de Tuenda van ser de baldre ya va poder asistir tola xente que quiera. Esti eventu forma parte de las actividades que se tán llevando a cabu dende’l Serviciu de Normalización Llingüística de Candamu pa promocionar la llingua asturiana como bien d’interés común del conceyu ya como dinamizador de la zona rural, pues la llingua ya’l desarrollu social pueden dir de la mano ya’l factor llingüísticu pue mover la economía d’una zona.

Tamién te podria gustar