Portada Educación Cuatro caderalgos entamen la carrera al Rectoráu pero namái unu usa l’asturianu

Cuatro caderalgos entamen la carrera al Rectoráu pero namái unu usa l’asturianu

by redacción asturnews

Los cuatro caderalgos qu’aspiren al rectoráu de la Universidá d’Uviéu entamaron ayeri llunes la campaña electoral presentando los sos programes, pero namái Santiago García Granda usa l’asturianu na so cartelería y presentación gráfica, acordies coles manifestaciones que ya ficiere nel mes de marzu.

Los cuatro candidatos qu’aspiren a sustituyir a Vicente Gotor espunxeron a lo llargo de la xornada del llunes los sos programes n’actos enforma simbólicos. Santiago García Granda y Pedro Sánchez Llazu tuvieron en Xixón pa defender la descentralización de los recursos, y nel casu de García Granda tamién los centros pequenos al desenvolver so actu de presentación na Escuela Superior de Marina, mientres n’Uviéu, José Muñíz y Agustín Costa pegaron cartelos nes sos respectives facultaes.

Santiago García Granda defendió ayeri ‘un equipu eficiente y cercanu’ y fízolo al mesmu tiempu n’asturianu, n’inglés y en castellán como sedrá la so páxina web que se presenta mañána miércoles a les 12 na Biblioteca del Milán, n’Uviéu.  Tresparencia interna y esterna, más titulaciones, asina como evitar la xudicialización de conflictos, potenciar trámites electrónicos, fomentar la investigación interdisciplinar y promocionar l’asturianu cola creación d’una Oficina de Normalización son les sos apuestes cimeres.

El lema de Costa ye ‘Por una universidá entamadora’, volcándose na amestaura de la producción científica cola xeneración d’empléu y riqueza. El eslogan de Muñíz ye ‘Toos faemos Universidá. Depende de ti’ y Lazo sostien que ‘Otra Universidá ye posible’. Pero dengunu de los tres fizo denguna referencia a la llingua asturiana nin uso l’asturianu nes sos presentaciones o na so cartelería.

Tamién te podria gustar