CTIC y La Curtidora d’Avilés collaboren para impulsar oficines d’Acelera PYME

CTIC y La Curtidora d’Avilés collaboren para impulsar oficines d’Acelera PYME col oxetivu d’asesorar ya impulsar dixitalmente a Pymes, autónomos y entamadores, y resolver duldes nel so tresformamientu dixital. La Curtidora va sopelexar la iniciativa y va fomentar la participación de les empreses d’Avilés treslladando les necesidaes qu’espongan.

El conceyal de Desenvolvimientu Económicu, Manuel Riola, y el director de CTIC, Pablo Priesca, presentaron la selmana pasada l’alcuerdu de collaboración ente’l Centru de Servicios a Empreses La Curtidora y la Fundación Centro Tecnolóxicu de la Información y la Comunicación (CTIC) pa la participación nel proyectu de creación de la rede d’oficines d’Acelera PYME.

Les Oficines Acelera PYME funcionen como un puntu tantu físicu como virtual pal asesoramientu ya impulsu dixital de les Pymes, autónomos y entamadores, y pal resolvimientu de duldes nos sos procesos de tresformamientu dixital y pa la realización d’acciones de sensibilización y sofitu nesti ámbitu.

Per mediu d’esti alcuerdu La Curtidora comprometese a collaborar nel espardimientu del proyectu contribuyendo a la participación de les PYMES d’Avilés nes actividaes; a treslladar les necesidaes, demandes y moliciones que repare ente les sos empreses; a sofitar y reforzar el desenvolvimientu ya impactu de les actividaes; y a evaluar l’impactu de les actividaes desenvueltes, proponiendo les meyores que considere oportunes. Pela so parte CTIC comprometese a realizar y coordinar les actuaciones y reportar dacuando les resultancies.

El proyectu presentase pa financiamientu a Rede.es, tando prevista una ayuda per parte de Rede.es del 80% del costu elexible, comprometiéndose CTIC a apurrir el 20% restante, amás de los costos non elegibles. La collaboración de La Curtidora va suponer l’aportación de recursos a mayores para maximizar l’impactu del proyectu.

El presente alcuerdu va tener una duración equivalente a la duración del proyectu, incluyíos los sos tiempos de tramitación previa y xustificación posterior, colos plazos que s’envaloren de siguío:

• Julio 2020: preparación y presentación del proyectu.
• Avientu 2020: resolvimientu de les ayudes.
• Añalidaes 2021 y 2022: execución del proyectu.
• Añalidá 2023: xustificación del proyectu.