CSI Mocedá espubliza un documentu nel qu’espón les sos bases d’acción

10 xineru 11:34 2011 Imprimir

La estaya de Mocedá del sindicatu asturianu CSI aprobó’l pasáu 27 d’avientu un documentu nel qu’afita les sos bases ideolóxiques y d’acción. Nel documentu desmárquense de los grandes sindicatos “cada vez más burocratizados y centralizaos en Madrid” y falen de convertise en ponte ente la CSI, los nuevos movimientos sociales y los sectores combativos de la nueva xeneración d’asturianos, coles mires “de dir xenerando un movimientu xuvenil de resistencia global frente al esmantelamientu que sufre la sociedá asturiana en tolos sos aspeutos estructurales (económicu, social, ecolóxicu, cultural, llingüísticu, etc.)”.

¿Qué ye CSI-Mocedá?

Documentu aprobáu nel conceyu del 27 d’avientu de 2010.

¿D’onde venimos?

La llamada “Transición democrática” implicó una política de pactos y rindiciones per parte de los partíos tradicionales de la esquierda col consiguiente abandonu de posiciones combatives en defensa de los intereses populares. Entós remaneció un panorama sindicalista caracterizáu pola desmovilización de les bases y la burocratización corporativa de les cúpules directives. Nesi contestu social se funda en Xixón a lo llargo del añu 1982 una nueva organización que, recuperando la tradición asambleria del movimientu obreru, se va empobinar haza la autoorganización y autodefensa de el trabayadores asturianos. Esa organización ye la Corriente Sindical d’Esquierda (CSI).

Frente a los sindicatos mayoritarios, cada vez más burocratizados y centralizaos en Madrid, la CSI foise consolidando a lo llargo d’estos postreros 30 años como una referencia alternativa al traviés de distintes lluches contra la destrucción de los sectores granibles de la economía asturiana. Dalgunes d’estes lluches implicaron conflictos de llarga duración como ye’l casu de Naval Xixón. Anguaño la CSI ta desenvolviendo un procesu d’espansión territorial y social, consolidando la so estructura organizativa fuera de Xixón y estendiéndose a sectores llaborales onde nun tenía presencia enantes.

¿Quién somos?

CSI Mocedá s’estructura como una sección sindical de la CSI, tando asina dafechu integrada dientro de la estructura orgánica d’esti sindicatu. Polo tanto los sos militantes tienen los mesmos derechos y compromisos que cualesquier otru afiliáu de la CSI.

Dada la so naturaleza como organización especifica de mozos y moces dientro del sindicatu CSI Mocedá tien un calter tresversal a otres secciones y estructures de la CSI.

CSI Mocedá pretende ser una ponte ente la CSI, los nuevos movimientos sociales y los sectores combativos de la nueva xeneración d’asturianos, coles mires de dir xenerando un movimientu xuvenil de resistencia global frente al esmantelamientu que sufre la sociedá asturiana en tolos sos aspeutos estructurales (económicu, social, ecolóxicu, cultural, llingüísticu, etc.).

¿Ye necesaria la llucha?

El paru, la precariedá, la sobresplotación llaboral y la crisis económica polo xeneral nun son fenómenos que puedan analizase de forma aisllada del marco sociu-históricu en que se producen, sinón que son la resultancia de l’aplicación de polítiques concretes que tienen responsables gubernamentales y empresariales concretos.

La destrucción del texíu granible asturianu (agricultura, ganadería, pesca, minería, industria, etc.) ensin crear nel so llugar nueves actividaes económiques, que respondió a una política planiada en función d’intereses esternos al pueblu asturianu, ye lo que construyó’l murniu presente que vivimos anguaño los mozos asturianos. Asina l’actual crisis global vieno a sumase y a afondar la crisis específicamente asturiana.

L’esmantelamientu de la economía asturiana ta acompañáu d’una política de palu y cenahoria, que combina la represión con falses salíes individuales al curtiu plazu. Y cuando la realidá ye qu’añalmente se ven obligaos miles de mozos asturianos a pasar pol trauma d’emigrar fora del territoriu asturianu en busca d’un empléu, a los mozos asturianos si realmente queremos tener dalguna posibilidá de vivir y trabayar dignamente nel nuesu País mos correspuende entamanos y movilizanos. Pos si la naturaleza de los nuesos problemes ye colectiva y política, a éstos vamos deber de dar respuestes igualmente colectives y polítiques.

Una alternativa de llucha pa la mocedá asturiana

L’alternativa sindical qu’ufiertamos a los mozos y moces de Asturies caracterizase por ser un proyectu sociu-políticu de clase, autoxestionariu y asturianu.

Como organización de clase, defendemos un sindicalismu de proyección unitaria y anticapitalista. Entendemos que na sociedá actual les distintes posiciones sociales qu’ocupen les persones en rellación a los procesos de producción y distribución de la riqueza les asitien en clases sociales con intereses distintos y contradictorios ente si. Y frente a la desmovilización social esistente y los modelos corporativos d’organización aisllada de el trabayadores en base namás a la so empresa o la so categoría profesional, apostamos sindicalmente pola organización unitaria del conxuntu de los trabayadores pa la defensa de los sos intereses comunes frente a la esplotación capitalista.

Como organización autoxestionaria lluchamos pola restauración de les asamblees como centros de decisión del movimientu obreru. Igualmente sostenemos internamente un marcu organizativu que promociona la participación de tola afiliación nel proyectu colectivu de la nuesa organización, cuidao qu’entendemos que la Democracia ye una práctica social que se tien qu’afirmar na cotidianidá. Por eso optamos pola responsabilización colectiva y refugamos la figura del militante “lliberáu”. Igualmente apostamos pola independencia económica al respective de les Alministraciones públiques, pos el PSOE utilizó les subvenciones pa construyir una rede clientelar mercando voluntaes y adomando asociaciones.

Como organización socio-política proponemos superar el modelu clásicu de sindicalismu, identificáu puramente cola redolada llaboral, construyendo un proyectu qu’integre los intereses globales de la clase trabayadora asturiana dientro y fora de los centros de trabayu. Asina la nuesa alternativa sindical ye incluyente tantu de la defensa de los derechos llaborales, sociales y civiles como d’unes condiciones dignes de vida pa toos. Temes tan distintes como la situación de la vivienda, la redolada ecolóxica o la llingua asturiana son elementos a trabayar dende’l nuesu proyectu.

Como organización asturiana, frente a la situación de subordinación de los intereses d’Asturies como sociedá especifica al respective de les polítiques gubernamentales de Madrid y Bruxeles, que tán planiaes en función de los intereses de la gran burguesía internacional, apostamos pola reconstrucción comuñal y ciudadana del Pueblu Trabayador Asturianu como suxetu políticu activu nuna llucha empobinada estratéxicamente haza la construcción d’una sociedá más xusta, más igualitaria y más llibre.

  Categories:
Loading Facebook Comments ...