Cruz Roja va sofitar a la direición de los colexos na repartida de material informático

La Conseyería d’Educación tramita les autorizaciones pertinentes por que la direición de los centros pueda movese hasta los sos colexos ya institutos y poder facilitar asina’l material informático a les families que nun disponen d’ellos.

Nesta xera, van poder cuntar col sofitu de Cruz Roja, según informó na tarde d’ayeri al traviés de la so páxina web, Educastur. Tendrán d’unviar un corréu electrónicu a la entidá (crjrespondecruzroja.es) col nome del centru, el so responsable y un teléfonu p’alcordar el día y l’hora de recoyida de los equipos, según del material didáctico que puedan precisar.

N’Asturies hai más de 6.000 escolares afectaos pola fienda dixital. Ante estos númberos, Educación pidió a los centros comprobar qué equipos podíen tar disponibles y, darréu, la Conseyería de Ciencia fixo un llamamientu a empreses y particulares pa vencer tablets y ordenadores. A esto suman les conexones unviaes pol ministeriu, una cifra insuficiente qu’Educación piensa ampliar con recursos propios, y les tarxetes de datos que tán facilitando los conceyos.

Los permisos por que los y les directores puedan circular y movese salió a rellucir na xunta que caltuvieron ayeri’l director xeneral de Personal Docente, Miguel Ángel Barón, y los seis sindicatos qu’integren la xunta de personal docente non universitariu (Anpe, UXT, CC OO, Suatea, CSIF y Sintta).

Nel so intre trataronse tamién otros aspeutos. Unu de los que más esmolez a los representantes de los y les trabayadores ye’l de les sustituciones del profesoráu que ta de baxa per enfermedá o aportara a la xubilación. La conseyería comprometese a volver a entamar les convocatories de llamamientu a profesores interinos pero pa cubrir aquelles places que considera «imprescindibles», referíendose a les de segundu de Bachilleratu, segundu cursu de ciclos formativos; cuartu de la ESO, sestu de primaria; Colexos Rurales Arrexuntaos (CRAs), escueles unitaries, departamentos unipersonales y tutoríes.

Pero los sindicatos, de forma unánime, reclamaron que se cubran toes y que «nengún alumnu quede ensin profesor». Ello ye que cuestionen los datos facilitaos pola Alministración señalando que dende la segunda selmana de confinamientu hubo cien profesores que se reincorporaron a la so plaza y solo hubo un únicu pidimientu de sustitución.

Coles mesmes, la conseyería señaló que, «de forma inminente, va publicase un resolvimientu estraordinariu sobre les instrucciones pa trabayar y evaluar el tercer trimestre», qu’empezó con munches duldes ya incertidumes. Precisamente, tola comunidá educativa tien puesta la mirada na Conferencia Sectorial que se va a celebrar esta mañana en Madrid, ente ministeriu y autonomíes, pa esclarialo y establecer un marcu común.