Crónica dende Lorient: Un domingu pa poder atalantar lo que significa’l celtismu

by asturnet | agosto 1, 2004 11:40 pm

Nun hai meyor forma de convencer a naide de la esistencia d’un espíritu celta ente los pueblos que se nomen como tales n’Europa qu’una xornada como la que tolos años se repite nel primer domingu d’agostu nes cais de Lorient. Xente asturiano, gallego, galés, bretón, escocés, irlandés, de la Islla de Man, de Cornualles… xente australiano de raigañu célticu o canadiense como los qu’esti añu vienen de L’Acadie, na rexón francófona de Quebec nel Canadá… Toos ellos amiéstense nun únicu sentir que tien a la música como referente fonderu que xune por más que les llingües estremaes que falen paezan separtar.

Ye la gran ‘Parade des nations celtes’ y la xuntura bien encadarmada de 3500 músicos y danzantes, tocaos dende’l primeru al caberu colos sos traxes tradicionales, tan llamativos como descubridores del alitar d’un pueblu y tan estremaos los unos de los otros y ensin embargu tan asemeyaos no verdaderamente importante.

Dende les 10 de la mañana entamen a salir desfilando los primeros grupos, que van entemeciendo nacionalidaes y faciendo una guapú amiestu estéticu y musical de sones asturianos y escoceses, irllandeses y gallegos, escoceses y bretones. Neños con vestimentes d’hai dos sieglos, moces que reflexen nel vestir tradicional la so mocedá con gayola, güelos qu’afalaguen con saludos de siempre y que lleven en cuellu les esperances futures.

Música y dances a lo llargo de les cais de Lorient, con xente arrodiando cada centímetru de la carretera y aplaudiendo con ganes cada vegada que namái miren pa ellos con un saludu los que desfilen: orgullu de ser como son, xustamente lo que siempre definió a esos pueblos, naciones ensin nación, que perdieren toles guerres y ganaren toles simpatíes.

La simpatía ye lo que toma estos díes Lorient. Un puertu (deportivu) tomáu non pola ñeve, sinón pola gayola. Y la música, de forma tala que se pue sentir a les moces gallegues canciando sones picardiosos que falen de cortexos, xunta bandes bretones que mos recuerden el llabor d’Alan Stivell espardiendo los sones con más raigañu d’esti país bretón.

[1]

Y tres del desfile, nel estadiu onde xorrez el barullu de más y más xente a la gueta de la más pequeña disculpa pa poer aplaudir ensin parar, los que desfilen cancien, toquen, baillen… Ye un momentu que nun se pue escaecer, como nun se pue escaecer otru desfile que pela tarde se fai nes cais de Lorient otra vuelta: ‘Le tromphe des pays celtes’. Tres mil músicos siguen peles cais de la villa bretona a les banderes de los pueblos celtes que s’axunten cada agostu equí.

Decía’l gaiteru asturianu José Angel Hevia que l’únicu sitiu onde se siente asturianu dafechu ye en Lorient. Y nun hai más que tar equí esta primer selmana d’agostu pa entendelo. Hai pueblos que puen sentise ellos mesmos nel so territoriu. Pero dalgunos, como l’asturianu, tienen d’esparder el so sentimientu fuera’l territoriu que los abelluga. Y hai territorios onde esi sentimientu nun hai que buscalu, porque s’alcuentra en cada requexu qu’ún tropiece nel camín. Hai llugares, como Lorient, onde ún se siente asturianu cuando topa con otru, o con un bretón, o con un escocés. Y nun fai falta saber idiomes. Ye como si tol mundu falara asturianu. Y como si tú falares toles llingües, romániques o gaéliques, que s’empleguen nos pueblos onde atopes el nome de ‘lugo’ allá perende pises. Los mesmos llugares que pisaren los ‘luggones’ cuando yeren pueblu guerreru y vencedor d’ente los pueblos celtes d’enantes de los romanos.

Gaites y más gaites

Pero la xornada del domingu tien a la gaita como protagonista. Bono, a la gaita non, a la cornamusa, a la versión que bretones, escoceses ya irlandeses empleguen nes sos bandes y que fai competir a los meyores solistes na tarde del domingu pa lluchar pol premiu más queríu: el Mac Callan, qu’ésti añu nómase Mac Crimmon.

Y pela nuechi la primer de les nueches máxiques, qu’esti añu se noma ‘Nuit Interceltique’ y qu’abren la vigulinera Dominique Dupuis, cabeza de cartel del festival pola so procedencia (L’Acadie), y Mariluz Cristóbal Caunedo, que fai tremar a los bretones como a los asturianos cola so fortaleza y la so gayola, que camuden la so canción nun verdaderu espectáculu.

Pero la nuechi máxica allárgase hasta la madrugada’l llunes y ye de la crónica d’esi día de la que, en xusticia, tendría de formar parte.

Suplementu d’Asturnews sobro’l Festival de Lorient 2004[2]

Endnotes:
  1. [Image]: http://asturnews.com/bancofotos/fotos/2/424.jpg
  2. Suplementu d’Asturnews sobro’l Festival de Lorient 2004: http://www.asturnews.com/lorient.php

Source URL: http://asturnews.com/cronica-dende-lorient-un-domingu-pa-poder-atalantar-lo-que-significa%c2%92l-celtismu/