Crónica dende Lorient: L’estrenu de ‘Keltikhé’ y l’aportar de Chus Pedro

by asturnet | agosto 5, 2004 11:40 pm

El xueves ye un día ensin muncho que facer pa la delegación asturiana en Lorient. A lo menos davezu. Pero esti añu había un acontecimientu que nun se mos podía escaecer. Pola so importancia cultural, escénica ya identitaria. Estrenábase ‘Keltikhé’, definida pol mesmu autor como una “cantata pa celtes y orquesta”, lo que pue ser enforma significativo pa desplicar lo que quier algamar esta composición sinfónica: “convertir la tradición al mundu sinfónicu teniendo como entamu la fuercia de la voz tradicional de les muyeres asturianes”. Voces de muyer améstense nesti sen coles bombardes, les gaites, el binioù, el bouzouki o los whistles pa formar una estaya tradicional que se va meciendo na cantata de Ramón Prada colos instrumentos clásicos. Y eso fizo Ramón, y eso llograron la orquesta lorientesa y los músicos asturianos que xunta Fred Morrison y el grupu Muyeres, ente otros artistes y coleutivos musicales participaron d’un estrenu tan esperáu como significativu. Un estrenu del que dimos cuenta nestes mesmes páxines d’Asturnews y del que nun vamos repetinos.

Namás que tenemos de recordar cómo ye la obra, que de xuru podremos ver bien pronto n’Asturies y que merez ser escuchada muncho más que descrita.

La obra preséntase estremada en seis movimientos qu’entamen con ‘Avalon’, una obertura de la que surde la voz nel segundu movimientu, ‘Muyeres’, nel que s’interpreten cancios tradicionales como ‘La Danza de les Vieyes’ (una danza prima arrecoyida en Mieres del Camín y qu’entama col romance de San Juan Verde), ‘Cantar bien neña’ (una tonada del más fondu estilu ayerán) y dos dances vaqueires (La Gallegada y La Media Vuelta), y darréu ‘Carnac’, un movimientu inspiráu dafechu nel misteriu qu’arrodia a les piedres bretones que se caltienen nesa rexón y que de lo más arraigonao va treslladando l’ambiente a un adagio melancólicu pa gaita irlandesa y low whhistle.

‘Lancelot” ye’l cuartu movimientu de la obra y apurre l’únicu romance de temática artúrica que se conoz n’Asturies y que val, sigún se recueye nel programa, “pa da-y vida, agora cola voz solista, a la lleenda”. El quintu movimientu, ‘Lugnasad’, amuesa l’ambiente de la fiesta cola que los celtes festexaben el veranu, emplegando pa ello un binioù-koz, una bombarda tenor y una faita asturiana, cubriendo d’esta mena una gama de más de cuatro octaves.

‘Ástura’ ye’l movimientu final, y xermen de tola obra, que surde dende la ñeblina pa finar con un canciu tradicional a coru que xune otra vuelta la orquesta cola tradición de mayor raigañu.

Primero disfrutamos d’una tarde d’ensayu xeneral como poques. A les nueve y media tremamos pol desendolcu del estrenu. Y a les once, na recepción que’l patrocinador del conciertu, el míticu diariu Le Monde, ufiertó nel Mercáu de Lorient, pudimos felicitar con gran ciñu a Ramón Prada y los demás llogradores d’un eventu que dexó Asturies al altor que se merez n’Europa, por muncho que n’Asturies sigamos ensin viaxar lo suficiente. O polo menos, siguen ensin viaxar los suficiente los que nos alministren, colo que davezu nun tienen perspeutiva denguna de que’l mundu hai tiempu ya que nun ye planu, sinón más bien asemeyáu a una pelota.

L’aportar de Chus Pedro

Pero tamién foi esti xueves xornada de recepción. Recepción de veteranos de la música astur como Chus Pedro, qu’aportaba colos sos músicos yá bien entrada la tarde y que mos cuntaba lo que venía a presentar equí na nueche del vienres, na primer conversación que caltenía con un asturianu en Lorient. Cuntaba p’Asturnews lo que venía a facer equí, a presentar el so discu pero tamién a seguir disfrutando con una presencia qu’entamó l’añu pasáu cuando vino pa participar nel Día d’Asturies. Pero Chus Pedro ye crónica de vienres, como otres celebraciones tradicionales de la delegación d’Asturies en Lorient de les que ye pronto pa falar.

Suplementu d’Asturnews sobro’l Festival de Lorient 2004[1]

Endnotes:
  1. Suplementu d’Asturnews sobro’l Festival de Lorient 2004: http://www.asturnews.com/lorient.php

Source URL: http://asturnews.com/cronica-dende-lorient-lestrenu-de-keltikhe-y-laportar-de-chus-pedro/