Crónica dende Lorient: Díes de pigazu y soníu astur

03 agostu 23:40 2004 Imprimir

En Lorient hai más díes que llonganices. Hai díes pa nun parar de danzar. Díes pa quedar roncos. Díes pa nun pigazar un segundu. Y díes pa dormir dafechu. Y dalgunos qu’ensin ser agotadores ponen-y torgues al disfrute de lo de ún. El martes 3 d’esti agostu de 2004 foi d’estos caberos.

Nun hebo muncho que facer pela mañana. Namái qu’averase al Gran Teatru de Lorient pa sentir l’entamu de los ensayos del estrenu del xueves de Ramón Prada, pa sentir los primeros compases en tierres bretones de ‘Keltikhé’. Pero depués de comer axuntábense los llabores. Los interesaos en siguir les evoluciones de los representantes asturianos en Lorient teníen d’andar atentos pa poder aplaudir a Los Gatos del Fornu nel Palaciu de Congresos a eso de les cuatro la tardi y darréu salir corriendo pal Cabaret del Festival, onde ya taben sonando les gaites de la Banda de Candás.

Y ficiéronlo perbién. Aportaron a tiempu de ver la segunda actuación de los Gatos del Fornu en Lorient, más aposentada que la primera, colos problemes del soníu propios de los escenarios onde nun se pue ensayar una migaya enantes d’entamar, pero dafechu superaos pol bon llabor de los componentes d’esti grupu seriu y bien encadarmáu que-y dedica un mínimu procuru al directu.

Afitándose nes voces llimpies y tradicionales de Rosa y Ana, Los Gatos punxeron l’acentu modernu a una tarde en Palaciu Congresos enforma tradicional y amestando los sos sones más fusionaos colos cancios tradicionales del occidente persupieron ganase a un públicu que nun aparó d’aplaudir no postrero l’actuación. Una parte cabera que Los Gatos resuelven perbién con un pequeñu concursu nel qu’ufierten un CD a quien d’ente el públicu s’anime a xubir al escenariu y acompangar a Rosa y Ana con un estribillu a lo ‘la,la,la’ en versión tradicional del Occidente que resulta graciosu y apañáu y ye dende llueu un final curiosu pa un conciertu bien camentáu nel que namái s’echa en falta lo mesmo que se-yos escaez a tolos demás grupos de folk asturianos, dende los más veteranos como Llan de Cubel a los más recientes pero afitaos como Niundes: sentíu del espectáculu. Nun ye que nun curien el direutu. Fáenlo dende la perspeutiva musical, pero non dende la espectacular.

Lo más difícil del mundu nun conciertu d’un grupu folk asturianu ye poder face-yos una foto xuntos nel escenariu a tolos componentes. Pue haber una o dos oportunidaes en tol conciertu. Denguna más.

Entá sigue ún aplaudiendo a Los Gatos del Fornu y ya ta ablucáu pola presencia nel escenariu de la Banda de Gaites de Candás. Poques bandes tienen l’aposientu de la candansina nel escenariu. Y poques s’apañen tan bien pa que-yos sirva un escenariu como’l del Cabaret pa brillar como lo fizo esti martes la Banda de Gaites de Candás. Un repertoriu tradicional, pero ensin escaecer esos arreglos que-yos dan un aire nuevu a les bandes asturianes, valió-y a la banda candansina p’arrincar aplausos sobraos nel Cabaret y llamar l’atención d’un públicu que ye mui esixente coles bandes de gaites, de fonda tradición en Bretaña. La Banda yá participare en delles actuaciones nel Estadiu de fútbol, dientru les nueches del Festival, la primer vegada’l sábadu na nueche de les cornamuses y esti mesmu martes na primer nueche máxica, pero nel Cabaret yera la primer vegada que lo facía nuna carpa y pasó la preba con nota.

La nueche faise tranquila y bayurosa. Nun hai actuaciones asturianes y pue disfrutase d’atopar a los músicos de nueso caleyando por Lorient y diendo pa los escenarios onde la música ‘cajún’ abarrota’l Hall de Mostoir (un perguapu ximnasiu camudáu en maraviellosa sala de conciertos alternativos) o a sentir a Susana Seivane xunta la Bagad Kemper nes afueres del Gran Teatru onde’l llenu dafechu obliga a los organizadores a proyeutar nuna muria les evoluciones nel escenariu con una sonorización enforma granible.

Y la nueche allárgase hasta que l’amenaza de la lluvia qu’aportará de xuru al día siguiente se fai notar.

Suplementu d’Asturnews sobro’l Festival de Lorient 2004

  Categories:
Loading Facebook Comments ...