Cristina Fernández y Lucía Rodríguez ganen el X Premiu Astragal

El X Premiu Astragal, qu’organiza l’Institutu Asturianu de la Mocedá en collaboración col Conceyu de Mocedá de Xixón, va dir parar esti añu a Cristina Ferrández Box y Lucía Rivero Rodríguez, por dos proyectos artísticos que van ver la lluz, nel Espaciu Astragal de Xixón, ente l’últimu trimestre de 2009 y entamos de 2010. Cada galardonada recibe 6.500 euros de premiu, colos que tienen de producir los proyectos presentaos nel concursu y asoleyar los catálogos.

Cristina Ferrández, xoven artista alicantina (1974) afincada n’Asturies, presentó un proyectu tituláu “Huertos urbanos”, mientres que’l de la xixonesa Lucía Rodríguez (1984) lleva por títulu “El Perro romántico”.

El Premiu Astragal, que ta incluyíu na convocatoria añal del Institutu Asturianu de la Mocedá baxo la denominación xenérica Culturaquí, ta concibíu pa dar cabida a proyectos artísticos ideaos específicamente pa la Sala d’esposiciones del Conceyu de Mocedá de Xixón y la so interacción cola ciudá onde ta allugada. A esta edición concurrieron un total d’ocho proyectos artísticos.

El Xuráu, nel que figuraben Pilar Lafita, Rosina Gómez-Baeza, Ignacio Quesada Alonso y Jaime Luis Martín, distinguió los dos proyectos premiaos pola calidá artística espositiva, pola claridá de proyección y la viabilidá de la execución.