Cristian González fala de la mina y el carbón na cocina del Valle’l Nalón

15 11:00 2012 Imprimir

Esta tarde a les 20:00 hores, la Casa los Alberti de Ciañu, va recibir al famosu cocineru y presentador de televisión Cristian González que va poner la charra Mina y cocina nel Valle’l Nalón. Esta charra enmárcase dientro de les III Xornaes Culturales De Castilletes y Carbón qu’organicen la Fundación Nuberu y l’Ayuntamientu de Llangréu. Trátase de la tercer edición d’una actividá de dinamización cultural qu’estes dos entidaes ponen en marcha como consecuencia del conveniu de collaboración firmáu ente elles.

De Castilletes y carbón, son unes xornaes culturales que xiren alredor de les interrellaciones ente mina, música, lliteratura, economía, gastronomía… y qu’empezaron el xueves pasáu cola participación d’Enrique Fernández Rodríguez, economista y alcalde de Samartín del Rei Aurelio, que tamién van tener continuidá los próximos xueves d’esti mes de payares cola participación d’Ana María Cano González, doctora en filoloxía romana y presidenta de l’Academia de la Llingua Asturiana y que van rematar col recital lliterariu Compañeru dame tira que, con guión y dirección de Chechu García, van poner los escritores Manuel Asur, Xurde Álvarez, Pablo Texón, Lurdes Álvarez, Henrique Facuriella, Xosé Ramón Martín Ardines y Roberto Corte.

Va ponese’l ramu a estes xornaes con un conciertu de Nuberu nel Teatru L’Entregu’l 4 d’avientu, día de Santa Bárbara, patrona de la minería.

  Categories:
Loading Facebook Comments ...