Créase una plataforma pa la defensa del asturianu y el gallegu en Lleón, Zamora y Salamanca

28 febreru 05:33 2011 Imprimir

Once asociaciones roblen un manifiestu conxuntu esixendo a la Xunta de Castiella y Lleón el desenvolvimientu normativu y el cumplimientu efectivu del artículu del Estatutu d’Autonomía qu’establez la protección de los dos llingües minoritaries de la comunidá autónoma onde s’asitien los territorios de Lleón, Zamora y Salamanca. El vienres pasáu celebróse’l conceyu en Zamora, onde se constituyó la “Plataforma en Defensa del Leonés y del Gallego”.

Esti conxuntu d’asociaciones reclamen del Gobiernu Autonómicu l’adopción d’una política activa empuesta a la protección y promoción del usu de dambes llingües, tal como recueyen y prescriben los artículos 5.2 y 5.3 del Estatutu d’Autonomía de Castiella y Lleón. Dichos artículos aluden al respetu y la protección a la llingua gallega nos llugares onde s’utiliza y reconoz el particular valor del lleonés dientro del patrimoniu llingüísticu de la Comunidá, prescribiendo, amás, la regulación de la so protección, usu y promoción.”

Les asociaciones recuerden que’l gallegu ye llingua tradicional y d’usu habitual na parte occidental d’El Bierzo y de Sanabria. Pel so llau, el lleonés ye la llingua patrimonial de les contornes de la franxa norte y occidental de Llión, del noroeste de Zamora (escluyendo en dambos casos les zones gallegofalantes) y del estremu sudoccidental de Salamanca.

Les asociaciones constituyentes de la Plataforma en Defensa del Gallego y del Lleonés denuncien que, “mientres les demás comunidaes autónomes con patrimoniu llingüísticu distintu del castellán amparen les distintes llingües falaes nos sos territorios –seyan o non oficiales– y a los sos falantes, la de Castiella y Lleón desoi dafechu la protección del lleonés y, de forma parcial, la del gallegu”.

Esta ausencia de polítiques actives y efectives supón, según este organizaciones “una vulneración tantu del propiu Estatutu d’Autonomía como del restu de les normes xurídiques que tutelen el gallegu y el lleonés, esto ye: la Constitución Española, la Carta Europea de les Llingües Rexonales o Minoritaries del Conseyu d’Europa y la Llei de Patrimoniu Cultural de Castiella y Lleón”.

Dicha situación foi puesta de manifiestu y denunciada en repitíes ocasiones por distintes asociaciones culturales ya inclusive por diversu órganos de la mesma Comunidá Autónoma, como ye’l casu del Procurador del Común (Defensor del Pueblu) de Castiella y Llión y de les Cortes de Castiella y Llión, qu’encamentaron a la Xunta a llevar a cabu un cumplimientu efectivu del mentáu artículu 5.2.

El documentu robláu en Zamora esixe a l’alministración autonómica la creación d’un órganu alministrativu autonómicu encargáu de “les xeres de protección y promoción del lleonés y el gallegu, con cuenta de realizar una política de defensa de dambes llingües coordinada, coherente, eficaz y con continuidá”, y afala la promoción del gallegu y el lleonés “fomentando’l contactu cultural con otres zones que tamién tengan estes llingües como patrimoniales, anque diches zones tean fuera de les llendes alministratives autonómiques”.

Amás pide la Introducción del deprendizaxe del lleonés y el gallegu na enseñanza reglada “d’una forma afayadiza, con calter prioritariu nes zones onde estes llingües se caltienen o se caltuvieron n’usu polo menos hasta tiempos recientes, y d’alcuerdu a la demanda social nes demás zones”, xunto a la recuperación de la toponimia autóctona, y el sofitu a la creación cultural y lliteraria en lleonés y en gallegu, y a les publicaciones y editoriales qu’empleguen estes llingües.

Los colectivos que roblaron esti documentu son: Asociación Cultural Furmientu, Asociación Cultural Xente Nova, Buraco Asociación Cultural, Asociación Cultural Campo Aliste, Asociación Agora País Llionés, Asociación Ciudadanos del Reino de León, Documentación y Estudio de El Rebollar Asociación Cultural, Asociación Cultural Facendera pola Llengua, Asociación Cultural Fala Ceibe, Asociación Cultural El Teixu y Asociación Cultural La Caleya.

MANIFIESTU POLA DEFENSA DE LES LLINGÜES LLEONESA Y GALLEGA NA C.A. DE CASTIELLA Y LLEÓN

  Categories:
Loading Facebook Comments ...