Creación y arte pa esti mes de marzu con Asturies, Cultura en Rede

Creación y arte pa esti mes de marzu con Asturies, Cultura en Rede
05 marzu 11:44 2021 Imprimir

Asturies, Cultura en Rede ufierta esti mes de marzu propuestes d’artes escéniques, música, lliteratura, artes plástiques y visuales y cultura tradicional en distintos conceyos del Principáu.

Esti proyectu de la Conseyería de Cultura, Política Llingüística y Turismu, realizáu en collaboración colos conceyos asturianos, y xestionáu pola Sociedá Pública de Xestión Turística y Cultural del Principáu d’Asturies, busca dar mayor visibilidá a creadores d’Asturies, dinamizar la cultura y vertebrar el territoriu al traviés de distintos circuitos culturales temáticos.

Nel marcu del circuitu d’artes escéniques podrá vese Voces de Lluz de Gas Teatru nos conceyos de Colunga, Noreña, Llangréu y Carreño; Porno de ACAR Teatru del Mundu en Castrillón,Navia y Llangréu; Retablu de l’avaricia, la lluxuria y la muerte de Teatru del Norte en Castrillón; Amares de La Sorrisa del Llagartu en Salas; Muyer de Factoría Norte en Llaviana; ¡Ai Carmela! de la compañía De Carmela en L.lena; Cuentos del atapecer de Tragaluz Títeres en Nava; Nesa casa pasen coses d’El Caleyón del Gatu en Colunga; Setiembre d’Arte Producciones José Ricu Teatru en Corvera; Si pudiera… de Con Alevosía Teatru en Ribesella; Llamémoslo X de Lluz de Gas Teatru en Villaviciosa; y Nina Cocinamiedos de Mar Coloráu Teatru en Piloña.

Va haber música con Maraviyes del Cosmos nel conceyu de Llangréu, con L’Arca de Mozart en Nava, con Petip Pop en Cangues d’Onís y con Silvia Quesada en Cangas. Y la cultura tradicional va tar presente col recital Fundamentos d’Héctor Braga en L.lena, afondando na mitoloxía asturiana con Ponte la mázcara de Aladanza, educación y tradición en Noreña y colos Cuentos, conseyes y marionetes de Elisabet Martín Teatru en Xixón.

Nel marcu del circuitu de lliteratura podrá esfrutase de los cuentacuentos Lo que me cuntó la Tida Carola de Carlos Alba Cellero nel conceyu de Ribesella y en Muros de Nalón y de Puppys en Cangas y n’Uviéu. Elles viaxen de Vialibri, un proyectu de dinamización llectora y creación lliteraria, va llegar a Villaviciosa, a Tapia y a Colunga. Ester Sánchez, Premiu Nacional d’Edición en 2008, 2013 y 2014, va esplicar el procesu d’ellaboración d’un poemariu ilustráu en Cabranes, en Noreña, en Carreño y en Xixón y les hermanes Sil y Gema Fernández van ufiertar un espectáculu poéticu-musical, Animalías ya incertidume, nel Franco y n’Uviéu.

Amás, a partir del 27 de marzu podrá visitase en Castrillón la Triloxía poética ilustrada Al horru d’Ediciones Pata Negra, una amuesa del circuitu d’artes plástiques y visuales integrada por 60 poetes y otros tantos artistes plásticos na que s’homenaxa esti elementu mueble tan representativu d’Asturies.

A esta suma la programación cinematográfica de La Cinemateca Ambulante qu’en marzu ufierta proyecciones en 17 conceyos asturianos y en que na so cartelera destaca’l cine de non ficción fechu n’Asturies -con llargumetraxes de cineastes como Ramón Lluís Bande, Elisa Cepedal, Manuel García Postigo o Carlos Navarro- amás de títulos premiaos en grandes festivales internacionales como Josep o Beginning.

La programación de Asturies, Cultura en Rede puede sufrir cambeos en función de la evolución de la pandemia por Covid-19. Puede consultase les feches, horarios y l’información actualizada en www.asturiesculturaenrede.es.

  Categories: