Cooperación tendrá 12 millones d’euros en 2007. Palacios presentó los resultaos del proyectu Cooperantes 2006

31 ochobre 04:27 2006 Imprimir

El gobiernu asturianu empobinará más de 12 millones d’euros a cooperación, lo que supón una medra de 1,6 millones respectu al añu pasáu. Los datos asoleyólos Rafael Palacios, director de l’Axencia Asturiana de Cooperación al Desarrollu na presentación del proyectu “Cooperantes asturianos 2006″
Rafael Palacios grantizó que la medra presupuestaria va permitir actuar de mena más activa en cooperación. L’añu 2007 va ser “un añu importante p’Asturies nesta xera”. Hasta agora, polo qu’afirmó, “púnsose en marcha l’entramáu afayadizu creando l’Axencia de Cooperación y un marcu legal” y l’oxetivu sedrá agora “dotar a l’Axencia de recursos humanos” pa facer les xeres que “realmente necesita Asturies”.
El proyectu Cooperantes Asturianos 2006, la so segunda fase consiste na “realización de delles actividaes de sensibilización de la población asturiana”. El programa financióse pola Axencia Asturiana de Cooperación al Desarrollu con 26,500 euros.
El Director de l’Axencia Asturiana de Cooperación destacó que la primer fase “consistió en desenvolver una cultura de solidariedá ente la población asturiana en favor de los países probes” y pa ello, diez voluntarios desplazáronse a “El Salvador, Hondures, Guatemala y Máexico, cola fin de facer actividaes de cooperación”
Palacios comentó que l’interés de los asturianos por esta iniciativa “foi almirable” dao que, “presentáronse 53 solictues” y tres el procesu de selección, fueron 10 les persones a les que “se continuó informando sobre’l proyectu, en concretu nel que diben a desenvolver el so llabor como voluntarios”
Estes persones finalizaron la so estancia en Centroamérica y polo que comentó Rafael Paclacios “afortunadamente, toos ellos realizaron la so xera con normalidá”, incluso aumentando’l so nivel de compromisu, dao que dos de los diez voluntarios, Hector Álvarez Díaz y antonio Fontela, regresarán prosimamente pa siguir desenvolviendo’l so collaboración n’Hondures y Guatemala
Adolfo Rivas, en representación de Caritas, destacó que “anquaño se ta nuna nueva fase del proyectu, la más importante” na que se realicen “aiciones concretes aprovechando les diferentes plataformes y redes propies de caun de los voluntarios”. Rivas señaló dalguna d’estes aciciones ente les que s’alcuentren la “participación nel Foru de’Emprendedores Sociales en Vega de Rengos” y la “realización de charres y coloquios en parroquies asturianes, cases de cultura o en cases d’alcuentros de la Muyer”. El representante Caritas destacó que “un de los rasgos de la xente asturiano ye ser solidario” y poro, en 2007, l’Axencia Asturiana de Cooperación al Desarrollu tien previsto repetir el programa y refuercialu dao que, polo que destacó Palacios, el “presupuestu invertíu ye mui poco dinero pa tola ayuda”
P’acabar, Palacios comentó que tienen prevista la realización d’una esposición de fotografíes de la fotoperiodista Irma Collín Rodríguez, que viaxó per tolos países “p’averar a la sociedá asturiana’l llabor de los voluntarios”

  Categories:
Loading Facebook Comments ...