Cooperación al Desarrollu empobinó alrodiu un millón d’euros pa acciones humanitaries

L’Axencia Asturiana pa la Cooperación al Desarrollu dedicó un total de 911.200 euros a acciones humanitaries nuna decena países que se vieron somorguiaos en catástrofes naturales, béliques o debíes a causes estructurales. El dineru empleáu nestes ayudes sobrepasa la cantidá prevista de mano en casi el doble motivao por situaciones como les que padecieron países como Haití o Sudán. Pal siguiente exerciciu va entamase esta partida con un millón d’euros.

Rafael Palacios, director de l’Axencia Asturiana de Cooperación, fexo públicos estos datos énte los medios de comunicación pa rendir cuentes del dineru empleáu en socorrer a países envueltos en situaciones catastrófiques. El responsable d’esti departamentu resaltó que la filosofía que preside la distribuición de les ayudes nun se queda namás en sofitar a rexones del mundu desborades por cataclismos de la naturaleza sinón que considera igual de graves les catástrofes producíes por acción del ser humanu como guerres, xenocidios, desplazamientos o crisis económiques y sociales capaces d’emburriar a la población d’un país al llende de la sosistencia.Palacios desplicó les dos llinies enriba los que s’encadarmen les ayudes: el de la seguridá alimentaria, dedicáu a asegurar el suministru d’alimentos a poblaciones esfamiaes y l’ayuda d’emerxencia a países que necesiten socorru inmediatu énte una situación crítica.

A la postre empobináronse ayudes a diez proyectos xestionaos por diverses organizaciones humanitaries, la mayoría encarrilaos a países del continente africanu y del americanu. La cuantía más importante foi pa socorrer a la población de Darfur, en Sudán, nun proyectu de la Cruz Colorada desplegáu p’atender a los miles de desplazaos pol conflictu armáu de la rexón. El segundu proyectu al que se dedicó una cantidá importante foi al dirixíu por Médicos ensin Fronteres nel conceyu angolanu de Kuvango p’atenciones sanitaries básiques. El restu les ayudes foron destinaes a actuaciones en Nicaragua, Chad, Sierra Lleona, Marruecos, Cuba, Haití y la República Dominicana.