Convocáu’l XI Concursu de Micro-rellatos “L’Horru del Carbayedo”

Convocáu’l XI Concursu de Micro-rellatos “L’Horru del Carbayedo”
04 xunetu 08:53 2017 Imprimir

Con motivu de les Fiestes de San Roque del Carbayedo, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Conceyu d’Avilés, vieno acabante convocar el XI Concursu de Micro-rellatos “L’Horru del Carbayedo” con un plazu presentación que fina’l día primeru d’agostu.

Con motivu de les Fiestes de San Roque del Carbayedo, a celebrase n’Avilés del 18 al 21 d’agostu del 2017, y col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Conceyu d’Avilés, dependiente del Serviciu de Promoción Cultural de la Conceyalía de Cultura, entama’l XI CONCURSU DE MICRO-RELLATOS N’ASTURIANU “L’HORRU DEL CARBAYEDO” que tien les BASES que vienen darréu:

1- Pue participar cualquier escritor/a en llingua asturiana, como muncho con dos rellatos orixinales. Nun se se van almitir los que se presentaren n’ediciones anteriores.

2- Los rellatos nun puen pasar de les 500 pallabres. La temática ye llibre, pero la redaición tendrá que respetar les normes ortográfiques y gramaticales marcaes pola Academia de la Llingua, desaniciando los que nun cumplan con ello.

3- El plazu pa presentalos pieslla a les 14 hores del día 1 d’agostu.

4- La presentación sólo pue facese per Corréu Electrónicu, mandando los rellatos en formatu documentu de WORD 97/2003 a: avvelhorreo@yahoo.es. Los trabayos dirán encabezaos per un TÍTULU y firmaos namái con un NOMATU. Nel corréu electrónicu axuntaráse un archivu aparte, que la organización (A. VV. El Hórreo) guardará en secretu, ensin que’l xuráu pueda conocelu enantes del fallu, colos datos siguientes: nome, teléfonu, e-mail, señes, DNI, y títulu/os presentáu/os al concursu.

PREMIOS.
– Daránse dos premios: primeru, de 500 euros y troféu; segundu, de 300 euros y placa. Los dos premios nun pueden recayer nel/na mesmu/a autor/a, y, por lley, tarán suxetos a retención de IRPF.

DESENVOLVIMIENTU.
a.- El 4 d’agostu un xuráu formáu por especialistes en llingua asturiana y conocedores de la cultura asturiana determinará los trabayos ganadores.
b.- El llunes, 21 d’agostu, los/les autores lleerán los rellatos premiaos y recoyerán los premios, a les 18:00 hores, na sala escénica de la Factoría Cultural (Avda. de Portugal, 13, Avilés).
c.- Tolos rellatos presentaos, premiaos o non, van esponese al públicu al aire, nel prau la fiesta (Parque del Carbayedo), los díes que dure ésta.
d.- El Xuráu entenderá de cualquier dulda o problema que xurda. Nun se puen retrucar les sos decisiones.
e.- Presentase a esti concursu implica la plena aceutación d´estes BASES.

Loading Facebook Comments ...