Portada Reportaxe Convocáu’l VII Concursu de Monólogos “Pepe Campo”

Convocáu’l VII Concursu de Monólogos “Pepe Campo”

by asturnet

La Sociedá Humanitarios de Samartín de Morea (Ayer) convoca’l sétimu Concursu de Monólogos en collaboración cola Conseyería de Cultura del Gobiernu d’Asturies. Un concursu que lleva siete ediciones dedicáu al monólogu, pero que se convocó yá en 1997 como certame de narraciones.

Nesta ocasión pueden participar toles persones interesaes, col númberu de trabayos que-yos pete, anque’l ganador de la cabera edición nun podrá presentase. Premiaráse con 600 euros a aquel monólogu, ensin asoleyar qu’a xuiciu del xuráu presente más valir lliterariu. El premiu podrá repartise o quedar ermu. L’actu d’entrega del Premiu va formar parte de los actos inxeríos dientro les III Xornaes Culturales dedicaes a l’alcordanza de Joaquín Rodríguez Muñiz, que se cellebrarán na selmana del 7 al 11 de junio del 2010.

El monólogu tendrá que tratar d’un tema d’actualidá social, política y cultural. La obra podrá ser en versu o prosa; pero siempres n’asturianu. Valoraráse la correición llingüística y gramatical, asina como’l so calter normalizador del idioma. El llargor de los trabayos tendrá de ser d’un máximo de cuatro folios, en prosa o ente 150 y 200 versos.

El plazu d’entrega de los monólogos fina’l 30 d’abril de 2010. Ha mandase a estes señes: Humanitarios de Samartín, apartáu de correos 8, 33.670 – Morea (Ayer-Asturies). Cada trabayu tien que dir nun sobre zarráu, ensin remite, col orixinal y tres copies, y amás, dientro’l sobre habrá otru sobre onde se conseñen los datos del concursante.

La hestoria del Premiu Pepe Campo

En 1997 la Sociedá d’Humanitarios de Samartín convoca un concursu de narrativa del que formen parte como xuráu Pablo X. Manzano Rodríguez, Mar Madera Coto, Ánxel Álvarez Llano y Octavio Trapiella Fernández, ye entós cuando’l propiu xuráu apauta que’l certame lleve’l nome de Pepe Campo, escritor d’Ayer, que morrió en 1992 dexando una bayurosa obra de calter popular en llingua asturiana.

El primer premiáu con esti gallardón foi Xandru Martino Ruz, de Ribeseya, por “Tienes unos güeyos que manquen”, recibiendo un accésit Maria Belén Quirós López, de Vayu, (Grau), por “Tres nueches en La Fontona”, de “Caxigalines”.

En 1998 el xuráu suma a Miguel Ramos Corrada y Celsa Barbón Barbón, y decide da-y el primer premiu a María Meana Fernández, de Candás por “Alcordances”. Y un accésit a Pablo Rodríguez Medina, de L’Entregu, por “Los guardianes del mármole”.

Nel 99, Pablo X. Manzano vuelve al xuráu, al que se suma Paz García Álvarez, profesora de Llingua Asturiana p’adultos nel Conceyu L.lena. Recibe’l premiu aquel añu “Los Paraísos perdíos”, de Pablo Rodríguez Medina.

A partir del añu 2000, el xuráu queda fixu nes persones de Pablo X. Manzano Rodríguez, pola Academia de la Llingua Asturiana, Ánxel Álvarez Llano, como escritor y especialista en Llingua Asturiana pola Universidá d’Uviéu, y Octavio Trapiella Fernández, como Secretariu, en representación de Los Humanitarios de Samartín. Nesta ocasión el premiu diba a parar al escritor xixonés Naciu Varillas, pol testu “Nun t’esmolezas que siempres te voi entender”.

En 2001 vuelve a ganar Pablo Rodríguez Medina, nesta ocasión sedría con “Esparabanes nel silenciu”. En 2002 y 2003 y pola mor del probetayu númberu d’obres que se presenten, decídese cambiar les bases de la convocatoria y empobinar el Concursu “Pepe Campo” a rapazos d’hasta 20 años. Tanto na edición de 2002 como la de 2003, el premiu queda ermu al ver que les obres presentaes nun tienen calidá suficiente.

Ye nel 2004, aprovechando la fornada de nuevos monologuistes y la ruina acoyida del concursu na so modalidá anterior, cuando Los Humanitarios entamen el Concursu de Monólogos, respetando’l nome del escritor costumista, que tamién trabayó esti xéneru. Esi mesmu añu nun hai participación y el premiu, otra vuelta queda ermu.

En 2005, gana’l certame “Mio güelu ye un top-model”, de José Antonio de Dios, de L’Entregu. Na tercer edición, la de 2006, los xixoneses Inaciu Galán y González ya Isaac García de L’Arada faense col premiu por “Asturianos al volante”.

En 2007, “L’home y la gochería” de Benxa Pérez, de Xixón, consigue’l premiu. En 2008, Inaciu Galán, esta vegada en solitariu, faise col premiu na so quinta edición, por “Les vacaciones”.

Na cabera edición fallada, la de 2009, el premiu foi pa Carlos Alba, de Xixón, por “Medio analfabetu”.

El premiu paez anguaño afitáu como l’únicu entamáu pal monólogu asturianu, ún de los xéneros con más tradición na lliteratura asturiana, y que vive na década última un momentu d’importante renovación y ésitu.

Tamién te podria gustar