Convocáu’l programa de patrocinios pa proyectos de Llaboral Cinemateca

Convocáu’l programa de patrocinios pa proyectos de Llaboral Cinemateca
19 febreru 09:52 2021 Imprimir

Llaboral Cinemateca llanza una nueva convocatoria del Programa de patrocinios pa proyectos cinematográficos asturianos, nun nuevu apueste pol desenvolvimientu y fortalecimientu del sector audiovisual de la rexón.

Esta iniciativa tien como oxetivu venceyar y acomuñar la imaxe de Llaboral Cinemateca cola industria audiovisual d’Asturies por aciu la participación como patrocinador nel desenvolvimientu de proyectos cinematográficos de singular valor creativu que se realicen nel Principáu. Llaboral Cinemateca ye l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura.

El programa ta dirixíu a los profesionales y ceadores asturianos o con residencia nel Principáu d’Asturies qu’incluyan nel so oxetu social la creación y producción cinematográfica, que van poder presentar llargumetraxes o curtiumetraxes enmarcaos tantu na categoría de ficción como na de non ficción. Queden escluyíos aquellos trabayos de calter publicitariu, promocional o periodísticu.

Nesta nueva convocatoria va escoyese un máximu de dos proyectos na categoría de Llargumetraxes, con una cuantía, tamién máxima, de 14.900 euros per propuesta, y un proyectu na categoría de Curtiumetraxes que va recibir un máximu de 5.000 euros. Na selección de los proyectu valoraránse la calidá artística y técnica del trabayu, la orixinalidá y el riesgu de la propuesta y la participación significativa d’equipu técnicu y actores asturianos. Coles mesmes, va tener en cuenta la viabilidá técnico y artístico del proyectu en relación a los medios de los que se dispon, amás d’otros criterios sociales.

El formulariu de solicitú, y les bases completes de la presente convocatoria, tan disponibles na web de Llaboral Cinemateca www.laboralcineteca.es y tendrá de presentase, debidamente rellenáu y xuntu con tola documentación riquida, al traviés de la dirección de corréu electrónicu info@laboralcinemateca.es antes del 12 de marzu de 2021.

Descarga les bases completes de la covocatoria 2021.

Descarga’l formulariu oficial.

  Categories: