Convocáu’l concursu de proyectos empresariales “Avilés Empreses”

Convocáu’l concursu de proyectos empresariales “Avilés Empreses”
05 abril 10:24 2018 Imprimir

Esta selmana quedó convocáu’l concursu de proyectos empresariales “Avilés Empreses” dirixíu a persones que tengan una idea empresarial susceptible de ser llevada a cabu nel conceyu. 

Esti miércoles foi presentáu’l concursu de proyectos empresariales “Avilés Empreses”, dirixíu a persones que tengan una idea empresarial susceptible de ser llevada a cabu nel conceyu d’Avilés. La iniciativa ganadora va esfrutar d’un añu d’estancia gratuita nel Centru d’Empreses La Curtidora, lo mesmo que d’acompañamientu personalizáu mientres tol periodu.

L’actu cuntó cola presencia de Víctor Fernández, técnicu de Promoción Empresarial del Conceyu d’Avilés; María Luisa de Miguel, responsable del proyectu Entamemos; Fernando Milla, coordinador del Avilés Weekend Entamador -acción formativa intensiva entamada pol Conceyu d’Avilés y que se va celebrar los díes 25, 26 y 27 de mayu (www.avilesweekendemprendedor.org)- y Jorge López, coordinador del SlackLine Avilés Entamador, acción formativa de capacitación impulsada pol Conceyu d’Avilés y que se ta desenvolviendo na actualidá.

L’oxetivu d’esta convocatoria ye favorecer la nacencia de nuevos proyectos empresariales n’Avilés y facilitar so establecimientu nel Centru d’Empreses La Curtidora por aciu un premiu qu’inclúi un añu de gratuidá nel arriendu de la oficina, el desenvolvimientu de midíes que contribuyan a la so viabilidá y un serviciu d’acompañamientu personalizáu.

Amás, va apurrir a la iniciativa premiada una bolsa de viaxe para asistir al 8º Foru Européu pala Ciencia, Tecnoloxía ya Innovación, que se va celebrar en Málaga en febreru de 2019.

Los proyectos que se presenten tendrán d’atopase en fase embrionaria. Pueden participar tantu persones non constituyíes entá n’empresa, como sociedaes que cunten con menos de trés meses de funcionamientu, siendo la fecha de referencia para esti cómputu la d’alta en Facienda.

Les idees empresariales van ser valoraes según el grau de preparación y maduror que presenten pala so puesta en marcha. Coles mesmes, va valorase positivamente que cunten con un componente innovador y/o tean rellacionaos con tecnoloxíes disruptivas, que respuendan a demandes y necesidaes a escala local, que tengan una incidencia positiva pa escontra l’emplegu, y que tean promovidas por persones pertenecientes a los colectivos de menores de trenta años y/o mayores de 45.

El plazu de presentación de candidatures va rematar el 15 de xunu de 2018. Tendrán De formalizase nel Rexistru Xeneral del Conceyu d’Avilés, apurriendo xuntu cola correspondiente instancia, tantu la memoria de proyectu como un sobro zarráu nel que se van deber introducir les fotocopies de los DNI de les persones titulares de la idea.

Una vegada cerráu’l plazu de presentación constituyiráse un Comité d’Evaluación de les distintes propuestes, que’l so fallu va ser inapellable. La entrega del premiu va realizar nun actu públicu al que van ser convidaes toles persones participantes nel concursu.

  Categories: