Convocase’l Premiu “Alfonso Iglesias” de cómic

Nel BOPA d’esti 10 de setiembre espublízase la convocatoria del Premiu «Alfonso Iglesias» de Cómic, colo que yá tán convocaos tolos premios lliterarios n’asturianu qu’entama la Conseyería d’Educación y Cultura pa 2015.

Al gallardón al que se van poder presentar cómics escritos en llingua asturiana qu’han tener la estensión total mínima que se determina na convocatoria, van poer presentase obres completes o por primera vegada una alternativa al álbum ya fináu: un proyectu inicial con una estensión mínima de quince páxines.

L’estilu, tratamientu y tema van ser llibres, y la obra presentada va poder abarcar el desenvolvimientu d’una historia única o un conxuntu d’histories (rellacionaes o non ente elles). Y les obres presentaes han ser inédites y non premiaes n’otros concursos.

El plazu de presentación d’orixinales acaba’l 10 d’ochobre del 2015. Equí pues consultar la convocatoria y nesti otru boletín anterior la modificación de les bases del premiu publicada’l 30 de xunetu.

En collaboración con más de cincuenta llibreríes de la rexón, el 9 de mayu del añu pasáu los compradores de llibros n’asturianu o gallego-asturianu recibieron como regalu’l llibru “Dibuxando un camín”, qu’incluyía cuatro historietes gráfiques ellaboraes especialmente pa la ocasión por Isaac del Rivero, Ruma Barbero, Javier A. Marinas y Alfonso Zapico, ganadores d’esti Premiu «Alfonso Iglesias» de Cómic que la Conseyería vien convocando dende’l 2009.