Convocaes les subvenciones culturales nel conceyu Mieres

Convocaes les subvenciones culturales nel conceyu Mieres
18 agostu 12:07 2022 Imprimir

Esti mes acaben ser convocaes les subvenciones a la realización d’actividaes culturales nel conceyu de Mieres, con 40.000 € de presupuestu y que tienen de plazu hasta esta selmana.

El Conceyu de Mieres, al traviés de la conceyalía de Cultura que dirixe Juan Ponte, informa de que ta abierta la convocatoria de subvenciones a la realización d’actividaes culturales nel conceyu. Una convocatoria municipal que foi publicada nel Boletín Oficial del Principáu d’Asturies (BOPA) el 2 d’agostu y que tien un plazu pa la presentación de solicitúes de 15 díes a cuntar dende’l siguiente a la publicación, el 3 d’agostu.

En total, el presupuestu pa estes subvenciones ye de 40.000 euros y l’oxetivu de les mesmes ye, según consta nes bases y la convocatoria, “el fomentu del desenvolvimientu d’actividaes culturales al traviés de la concesión d’ayudes a entidaes y colectivos que s’atopen debidamente llegalizaos y que promuevan diches actividaes”. En concretu, van ser proyectos subvencionables les actividaes culturales en cualquier manifestación artística, actividaes d’ociu, aquelles que promuevan la participación de persones mayores, programes destinaos a la promoción de la igualdá de xéneru, actividaes que promocionen la nuesa gastronomía y recursos turísticos y aquelles rellacionaes con festexos populares.

Les solicitúes van tener que presentase, dientro del plazu establecíu, nel Rexistru d’Entrada del Conceyu de Mieres o en cualesquier otru rexistru oficial de los previstos por llei. Tola información sobro les bases y la convocatoria (plazos, documentación, criterios de valoración, solicitú…) puede consultase nesta web municipal y tamién nel BOPA del 25 d’ochobre de 2019 —fecha de publicación de les bases— y BOPA del 2 d’agostu de 2022, fecha de publicación de la convocatoria d’anguaño.

Más información