Convocaes ayudes p’asociaciones y colectivos de muyeres de Xixón

Convocaes ayudes p’asociaciones y colectivos de muyeres de Xixón
13 xunetu 08:44 2020 Imprimir

La Xunta de Gobiernu dispunxo na so sesión del martes pasáu una partida de 54.800 euros empobinaos a asociaciones y colectivos de muyeres de Xixón pal desenvolvimientu d’actividaes y programes cola finalidá de contribuyir a esaniciar la discriminación de les muyeres.

Estes subvenciones pa promover, sofitar y espublizar acciones que contribuyan a consiguir la igualdá real y efectivo y combatir la violencia exercida contra elles, van concedese en réxime de concurrencia competitiva con una llende máxima de de 3.000 € por entidá y añu. Les modalidaes de subvención son les siguientes:

A) Dirixíes a asociaciones de muyeres y otres entidaes que contemplen nos sos estatutos la igualdá d’oportunidaes ente muyeres y hombre

MODALIDAD 1: Actividaes de calter educativu y divulgativu que inequívocamente tengan perspectiva de xéneru y que tengan relación con estudios, trabayos d’investigación, xornaes de visibilización de les muyeres, xornaes de reflexón y alderique. Oxetivu: Sensibilizar a la población polo xeneral de la importancia de la igualdá de xéneru.
MODALIDÁ 2: Actividaes de calter permanente dirixíes a combatir la discriminación múltiple que carecen les muyeres en situación d’especial vulnerabilidá (muyeres inmigrantes, muyeres con discapacidá, víctimes de violencia de xéneru, agresiones sexuales…..) Oxetivu: Esaniciar la discriminación múltiple de les muyeres.

B) Dirixíes puramente a les entidaes que pertenecen al Conseyu d’Asociaciones de Muyeres de Xixón, incluyíes les vocalías de muyer de les Federaciones d’Asociaciones de Vecinos

MODALIDÁ 3: Xornaes y talleres pa promover la igualdá d’oportunidaes ente muyeres y homes, que refuercen y ameyoren les capacidaes y mañes culturales básiques (actividaes empobinaes puramente a muyeres).

Oxetivu: Ameyorar les capacidaes y mañes de les muyeres pa desendolcase con autonomía na redolada social, llaboral y cultural y reforzar l’exerciciu de derechos como ciudadanes. Potenciar y sofitar el texíu asociativo de muyeres pal fortalecimientu de la participación de les mesmes nel ámbitu público y social según nos espacios de toma de decisiones, desenvolviendo les capacidaes de lideralgu, de xestión y dirección de les organizaciones de muyeres.

Por cuenta de la pandemia, les memories de los proyectos tendrán d’incluyir obligatoriamente un apartáu qu’especifique con claridá l’adaptación de les actividaes a les midíes que’l Gobiernu dicte en cada momentu dientro del Plan pa la transición escontra una nueva normalidá.

Solo podrá presentase un proyectu per cada modalidá y nun va poder solicitase’l mesmu proyectu a modalidaes distintes. El plazu de presentación de solicitúes va ser de 15 díes arteros cuntaos a partir del día siguiente arteru al de la publicación del estractu de la presente convocatoria nel BOPA.

Cada asociación va poder presentase a un máximu de dos modalidaes de les convocaes y, nesi casu, va indicase l’importe que se solicita pa cada proyectu ensin qu’en nengún casu la suma total de dambos importes solicitaos pueda superar los 3.000€ señalaos enantes.

  Categories: