Consuelo Vega y Ana Cano devuelven la normalidá a les rellaciones ente l’ALLA y Política Llingüística

07 febreru 11:43 2008 Imprimir

Les tormentoses rellaciones que vivieron l’Academia de la Llingua Asturiana y la Conseyería de Cultura nos cuatro años de xestión de la Oficina de Política Llingüística por Ramón d’Andrés, llevaron a les dos instituciones a una falta de diálogu y una collaboración nula, col abandonu per parte de l’ALLA de la Xunta de Toponimia. Dende’l nomamientu de Consuelo Vega como Directora de Política Llingüística esti clima foi camudando y paez que les feríes van zarrándose, tornando, de la mano de les dos cabezaleres, a una nueva etapa de collaboración.

El primer alcuentru entre la, daquella, recién nomada Consuelo Vega y la presidenta de l’ALLA foi na inauguración de l’Arribada 2007, en setiembre, y ellí yá amosaron dambes dos la so disponibilidá pal diálogu y la collaboración. En payares, l’Academia celebró’l II Congresu Internacional de Lliteratura Asturiana y na inauguración participaron les dos, faciendo Ana Cano un llamamientu a la Directora Xeneral de Cultura, “pa que se normalice dafechu la relación ente la institución y la Conseyería de Cultura del Principáu”.

Pasu ente pasu, les conversaciones fueron avanzando y entamen a vese los primeros resultaos d’esta vuelta a la normalidá nes rellaciones de la Conseyería y la máxima institución del idioma asturianu. El primer de los pasos vieno cola vuelta de l’Academia a los conceyos de la Xunta de Toponimia, qu’hasta agora celebró namás una sesión, y agora vuelve a cristalizase na asistencia conxunta de les dos instituciones a la esposición “Expolangues”, que ta abierta en París los díes dende ayeri y hasta’l 9 de febreru.

  Categories:
Loading Facebook Comments ...