Consensu nes crítiques a les torgues de Maxisteriu pa col enseñu del asturianu

29 xineru 08:34 2009 Imprimir

Énte la votación que va llevase alantre güei na Escuela de Maxisteriu de la Universidá d’Uviéu pa que nun s’incluya l’asturianu ente les especialidaes de los futuros planes europeos, organizaciones y personalidaes de la vida pública asturiana amosaron la postura contraria estos díes.

El voceru del Bloque por Asturies, Pablo Fernández, consideró güei “llamentable” esti fechu que vien con “cambiu de filosofía sobre’l conceutu de la Universidá” qu’al so xuiciu ta introduciendo’l llamáu Plan Bolonia. “L’Asturianu”, señaló, “ye una llingua que sufre una serie de torgues nel ámbitu políticu, y denunciamos que tamién esto tenga una prollongación nel ámbitu de la Universidá”. “Dientro d’esta discriminación, en Maxisteriu creemos que l’asturianu va tener qu’acabar nun ‘máster’, que ye una forma refinada de discriminación, porque’l que quiera estudiar asturianu nel meyor de los casos va tener que pagar un pastón”.

El diputáu d’IX-BA-Verdes, Francisco Javier García Valledor, considera incomprensible que la Escuela Universitaria de Maxisteriu pretenda non incluyir la llingua asturiana como una mención más. Pa Valledor “la posibilidá de que la Escuela de Maxisteriu proponga un marcu de titulaciones nel que nun se recueya la llingua asturiana y el gallego-asturianu resulta dafechu imcomprensible, yá qu’esiste una llexislación na que la llingua asturiana s’imparte de forma voluntaria en tolos graos y niveles”.

El Conceyu Universitariu pol Asturianu amosó tamién el so descontentu pola decisión de Maxisteriu y espera qu’esti xueves “la cordura llegue a la Escuela de Maxisteriu” y los sos dirixentes “sepan dar marcha atrás nesta decisión contraría a la llegalidá vixente y que recuerda al pasáu” agora que la llingua asturiana “va tar homologada coles demás llingües na Facultá de Filoloxía”.

  Categories:
Loading Facebook Comments ...