Conoz a los autores de los rellatos ganadores y accésits del Premiu Asturnews

Güei xueves va entregase’l Premiu Asturnews a los ganadores d’esta primer edición y a los dos accésits. Ufiertamos agora una pequeña información sobre caún pa que conozas la so trayectoria.

Nicolás V. Bardio, ganador ex aequo col cuentu “Les nueches azules del llúnada” ñació n’Uviéu en 1987 y escribe dende bien mozu. En 2005 ganó’l primer premiu de bachilleratu nel «X Certame de Poesía de la Selmana de les Lletres Asturianes». Anguaño estudia Ciencies Polítiques en Madrid, dende onde sigue escribiendo una bayurosa producción de cuentos llargos qu’espublizó en Formientu y Lletres Asturianes, amás de na antoloxía de narrativa moza Vía de Serviciu. El cuentu col que ganó ta ilustráu por Iara Tormo Moreira.

Abel Martínez González, ganador ex aequo col cuentu “Una hestoria de pantasmes”, apaez en revistes como Lletres Asturianes o Lliteratura y nos últimos años algamó premios tán importantes como’l Premiu Uviéu de rellatu en 2006 o’l V Concursu de rellatu curtiu del Centru Asturianu de Madrid.

Nel casu de los accésit, Xavier Frías-Conde ñacíu en Béjar, Salamanca, nel añu de 1965, ye llicenciáu en Filoloxía Inglesa, doctor en Filoloxía Románica, profesor de llingüística y traducción na Universidá Complutense de Madrid. Ye un llamativu casu d’escritor multillingüe y de bayurosa producción n’asturianu, gallegu y castellán, amás de na fala del navia-eo.

Helena Trexu Fombella, ganadora d’otru accésit pol cuentu “Llara quier ser astrónoma”, ilustráu por Violeta Matéu, ñació en Sama, Llangré y residió en Cataluña dellos años. A la vuelta entama una carrera como escritora, centrada sobre manera na poesía y nel rellatu infantil. En 1989 da a estampa’l so primer llibru: Camientos, coses, curuxes y gana premios como’l Premiu de Poesía de L’Entregu en 1991 y el Concursu de Torna de l’Academia la Llingua cola so versión de El caminante y la muria de Salvador Espriu en 1995. Darréu gana otros y espubliza novela, cuentu y poesía hasta güei.