Conferencies, cuentacuentos y música nel circuitu cultura tradicional d’Asturies

Conferencies, cuentacuentos y música nel circuitu cultura tradicional d’Asturies
09 mayu 09:22 2022 Imprimir

La programación del circuitu de cultura tradicional de Asturies, Cultura en Rede hasta xunu inclúi proyectos de divulgación de la hestoria, l’arqueoloxía, el patrimoniu y la cultura popular asturiana al traviés de conferencies, cuentacuentos o música.

Laura Ilesia va falar sobro Los reis asturianos nuna conferencia teatralizada en Llanera y Noreña; Educa y Cine, sobro patrimoniu audiovisual en Lumière per Asturies en Balmonte; y Cuatro Gotes Producciones va ufiertar una charra sobro la hestoria de la llingua asturiana en Carreño y Bimenes y sobro la toponimia en Colunga. Sergio Buelga va repasar Un sieglu de teatru del pueblu: el Teatru Popular Asturianu en Carreño y va llevar xuegos tradicionales a La Ribera y Colunga con Xugando a la tarusa y Xugando al liriu.

Tamién va haber cuentos, cantares y poemes con Restolando de David Varela en Nava, Navia y Llaviana; Cuentos de la Xana, el Trasgu, el Cuélebre y el Nuberu de Elisabet Martín Teatru en Castrillón, Colunga, Noreña; Cantares y cuntares de Yheppa Títeres en Grau, Navia y Piloña; y cuentos tradicionales con Contábamelo la bruxa de Factoría Norte en Llanera, Navia y Ribesella. Carlos Alba Cellero va llevar Dos oreyes y xuna boca a Balmonte, Grau y L.lena y La matazuga a Muros de Nalón y Aladanza Educación y Tradición, Baille cuentu, a Candamo.

El repertoriu musical tradicional asturianu va amosase al traviés de distintos formatos n’Eso ye la de… de L’Arca de Mozart en Piloña; en Si Beethoven fora asturianu de Ensemble L’Arca en Navia; nos conciertos de Calea con Silvia Quesada, Ruben Bada y Leticia Baselgas en Llanes, A Veiga y Tinéu; o con Los Gascones en L.lena. Amás Leticia Baselgas va comentar la relación ente la muyer, la pandera y la música tradicional asturiana en charrar Ente’l punk y -yos ruxideres en Grau.

Nel marcu del circuitu de cultura tradicional de Asturies, Cultura en Rede programáronse pal primer semestre del añu 70 eventos de 23 profesionales en 27 conceyos, con un presupuestu que supera los 49.000 euros. Esti circuitu forma parte de Asturies, Cultura en Rede, un proyectu dela Conseyería de Cultura, Política Llingüística y Turismu, realizáu en collaboración colos conceyos asturianu y xestionao pola Sociedá Pública de Xestión y Promoción Turística y Cultural del Principáu d’Asturies, nel que tamién s’inclúin circuitos temáticos d’artes escéniques, música, artes visuales, Xacobéu, Autores Nel Camín, lliteratura y Cuadonga 2022 – Camín de los santuarios.

La información ampliada de la programación puede consultase na web asturiesculturaenrede.es.

  Categories: