Conciertu del cantautor estadounidense Luke Winslow-King na Factoría Cultural

Conciertu del cantautor estadounidense Luke Winslow-King na Factoría Cultural
24 ochobre 09:02 2018 Imprimir

Esti miércoles 24 d’ochobre a les 21 hores hai programáu na Factoría Cultural un conciertu del cantautor estadounidense Luke Winslow-King, que va sortear la guitarra LH-306 cola que va tocar na so xira europea. Les entraes pueden adquirise a un preciu de 8 euros, 10 nel día del conciertu.

Factoría Sound algama’l so segundu conciertu de la temporada de final d’añu. Fiel al estilu trazáu cola so apertura a distintes músiques, llega al espaciu escénicu de la Factoría Cultural Luke Winslow-King. El cantautor estadounidense afincáu en Nueva Orleans va ufiertar al públicu’l so blues sureñu, viñáu con influencies que van del jazz al country y el rock. va xubir al escenariu cola so banda’l miércoles 24 d’ochobre a les 21 hores. Les entraes, a un preciu de 8 euros (10 el día del conciertu), pueden adquirise nos calces habituales, les taquilles de la Casa de Cultura, y de forma telemática, al traviés d’Internet na web https://entraes.liberbank.es/palaciovaldes.

L’estadounidense va sortear la guitarra LH-306 cola que va tocar na so xira europea. Los que quieran formar parte d’esti sortéu pueden inscribise nel puestu de merchandising del conciertu de la Factoría Cultural. El sortéu va celebrase una vegada que remate la so xira per Europa. Más detalles en theloar.com

Luke Winslow-King toma’l relevu de Dewolff en Factoría Sound, una propuesta musical nacida pol impulsu de la Conceyalía de Cultura d’Avilés al traviés de la Factoría Cultural. Un ciclu de conciertos qu’atrai públicu de toa Asturies, convertíu yá en referencia nel norte d’España. Tres Winslow, van averar al espaciu escénicu de la Factoría hasta final d’añu Bob Wayne (31 d’ochobre), Spiders (16 de payares), y Hey Honcho & The Aftermaths (5 d’avientu).

El protagonismu nel conciertu va tenelu’l so últimu discu, “Blue Mesa”, llanzáu en mayu pasáu. Un álbum nel qu’el blues sureñu marca la pauta, pero nel que tamién tienen presencia’l country, el blues, el rhythm and blues, el rock, ya inclusive aires sicodélicos, reflexaos en temes como “Leghorn women”. Blue Mesa remembra l’estilu de Paul Simon y Robert Cray. La guitarra de Winslow tien l’arume d’un bluesman como Eric Clapton, pero tamién de Mike Campbell. Les sos temes vense teníes por un espíritu gospel, tamién pol infeiciosu soul de Stax. Cantares de carretera, que remembren percorríos personales, tola esperiencia del cantautor, reflexaos en lletres y xiros musicales.

Nacíu nel norte d’Estaos Xuníos, en Cadillac, una ciudá emblemática del corazón de Michigan, na so llarga trayectoria de más de 15 años, magar la so mocedá, pos tan solo tien 35, recibió distintos galardones y reconocencia. Como’l premiu al escritor de la selmana que concede la prestixosa revista American Songwriter Magacín o’l premiu al meyor bluesman por Gambit Magacín.

“Blue Mesa” foi grabáu na Toscana, n’Italia, cola collaboración de músicos como Roberto Luti, Chris Davis de King James and the Special Men, y Mike Lynch, ente otros. Reflexa a la perfección el so personal estilu, qu’encandila al públicu col agregu de la potencia de la so banda. Los sos conciertos son un viaxe a soníos reconocibles pol públicu. Y ye que los sos cantares sirvieron de banda sonora a series como NCIS Nueva Orleans.

La cita d’Avilés va ser la segunda de la so xira per España, qu’empecipió en Santander, y que va siguir con cuatro paraes más en grandes capitales, Madrid, Zaragoza, Valencia y Barcelona.

  Categories: