Concha Jerez algama’l Premiu Velázquez d’Artes Plástiques 2017

by redacción asturnews | noviembre 9, 2017 9:18 am

L’artista plástica Concha Jerez llogró esti martes, 7 de payares, el Premiu Velázquez d’Artes Plástiques 2017, que concede’l Ministeriu d’Educación, Cultura y Deporte dende l’añu 2002 y que ta dotáu con 100.000 euros, según informa esti departamentu.

El xuráu estremó a la canaria col galardón “pol rigor y compromisu de los sos ventureros planteamientos estéticos, desenvueltos mientres más de cinco décades tantu n’España como nel contestu internacional, según pol calter innovador de les sos propuestes entemedia”. “Tamién ye sobresaliente la so influencia en delles xeneraciones de creadores, la so vocación docente y el so compromisu cola comunidá artística”, según recueye l’acta del xuráu.

Esti galardón supon una reconocencia institucional a un creador que la so obra sobresal con especial significación nel ámbitu de les artes plástiques. Compénsase asina’l llabor del galardonáu al traviés de la concesión d’un premiu empobináu a destacar la so aportación sobresaliente a la cultura española ya iberoamericana pola totalidá de la so obra.

Concha Jerez (Les Palmes, 1941) cuenta con una trayectoria que toma 40 años d’actividá artística. Pertenez a la primer xeneración que n’España se adscribe al arte conceptual en diálogu cola producción Fluxus y col pioneru grupu español ZAJ. Medaya d’Oru al Méritu a les Belles Artes 2011, Premiu MAV 2012 en reconocencia a la so trayectoria como artista, foi galardonada en 2015 col Premiu Nacional d’Artes Plástiques “pola so dimensión pionera nel usa de les tecnoloxíes, por ser representativa d’una xeneración d’artistes que marcó’l tránsitu de la era analóxica a la cultura dixital, coles sos investigaciones, creaciones ya innovaciones”.

Source URL: http://asturnews.com/concha-jerez-algamal-premiu-velazquez-dartes-plastiques-2017/