Conceyu Abiertu por Noreña pide midíes urxentes pa salvar les Cases de los zapateros

Conceyu Abiertu por Noreña solicitó hai poco al equipu de gobiernu que se tomen toles midíes que tenga’l Conceyu na so mano pa velar pol caltenimientu de les conocíes como “Cases de los zapateros”. La propiedá incumple’l “deber de conservación” d’esti edificiu protexíu, poniendo en grave peligru esti importante patrimoniu, y el Conceyu tien de tomar midíes decidíes y urxentes pa salvaguardalu.

Parte importante del patrimoniu local, incluyíu nel catálogu urbanísticu de protección del conceyu como “claro esponente del paternalismu del que fueron oxetu los trabayadores a finales del s.XIX y principios del XX onde’l hixenismu foi una de les característiques más importantes” según afita Conceyu Abiertu por Noreña nuna nota de prensa, esta propiedá  “amuesa unes intenciones estétiques infrecuentes nesti tipu de construcciones” y que dada la escasez d’esti tipu de construcciones en Noreña confier-y gran singularidá. Amás, a nivel asturianu, destaca por ser unu de los escasos exemplos d’edificios civiles de dómina isabelina que se caltienen.

Esti conxuntu de viviendes foi construyíu alrodiu 1860 pol Dr. Dionisio Cuesta Olay y fueron adquiríes en 1910 pol reformista Pedro Alonso Bobes, pa taller y vivienda de zapateros, d’ehí que seyan conocíes como “Cases de los Zapateros” y enllace cola importante hestoria zapatera local. La so importancia ta fora de toa dulda y que, dende va muncho, nun esiste meyora sinón tolo contrario un fechu.

A finales del añu pasáu dende Conceyu Abiertu por Noreña interesáronse pola situación y dende la oficina técnica municipal informóse-yos de que se-y unviaren a la propiedá delles notificaciones riquiendo, per un llau unes “midíes inmediates” y “unes midíes urxentes” y per otru, la presentación d’un “proyectu de consolidación”, con un informe esplicativu de setiembre de 2016. “Naquel momentu tábase a la espera de contestación y teníase la intención de caltener un aconceyamientu cola propiedá p’avanzar” aseguren en Conceyu Abiertu por Noreña.

Unos meses dempués atopen, tres facer les preguntes pertinentes preguntes sobre’l casu al equipu de gobiernu local, que” nun esisten meyores na situación y que’l tiempu sigue corriendo en contra del caltenimientu d’esti patrimonio”. Ye por ello que dende Conceyu Abiertu por Noreña consideren qu’esti casu “tien de ser una prioridá política urxente yá que tamos llegando a un puntu de non torna y pidimos midíes decidíes dende’l Conceyu, s’esixa a la propiedá que realice les midíes que se-yos comunicó va meses y que de siguir cola so actitú refugando la so deber de conservación, el Conceyu empecipie los trámites pertinentes pa executales de forma subsidiaria, esto ye, realizar les obres el mesmu Conceyu y cargar los costos a la propiedá. Esta ye la única vía que queda pa evitar la so perda si la propiedá sigue desabriéndose poniendo en peligru’l patrimoniu, causando graves molesties a la vecindá, cola cera abarganada dende va años y el peligru que supón un inmueble abandonáu”.

Conceyu Abiertu por Noreña quier también “recordar, que según la Llei de patrimoniu asturiana l’incumplimientu de los requerimientos del Conceyu pal cumplimientu de les medies de caltenimientu de los bienes integrantes del patrimoniu Cultural d’Asturies, como ye’l casu de los elementos incluyíos en catálogos urbanísticos de protección, supondrá la imposición de multes coercitives. En casu de que los requerimientos pal cumplimientu del deber de caltenimientu nun sía atendíu, la llei contempla la posibilidá d’executar subsidiariamente les midíes que procedan, con cargu, a los responsables de la conservación. Nesti sentíu ye necesario recordar que nel Presupuestu de 2017 incorporóse, a propuesta nuesa y con vistes a posibles problemes nesti sentíu, una partida p’actuaciones subsidiaries que podría dar una mínima cobertoria a l’actuación”. Tampoco nun pue escaecese que según la mesma llei “ye causa d’espropiación l’incumplimientu del deber de conservación”.