Conceyu Abiertu por Llangréu pide que s’autorice la foguera San Xuan nel Parque Pinín

Un bon garapiellu d’hosteleros y comerciantes de la zona felguerina de Pinín solicitaron al Conceyu de Llangréu permisu pa poder entamar una foguera en San Xuan nel parque d’esti barriu, que nun abelluga nenguna actividá sociocultural y d’ociu enxamás. Tamién nesa xornada entamaríen un mercáu solidariu y estes actividaes fadríen que se dinamizara esta zona del nuesu conceyu, la cual enxamás tien actividaes d’esta triba qu’ufrir a los vecinos.

El gobiernu llocal yá respondió al coleutivu hosteleru y comerciante de Pinín cola ñegación del permisu pa cellebrar la foguera anque nun prohibió’l mercáu. L’Ayuntamientu xustifica la so posición en que l’asociación que solicita’l permisu pa la foguera nun ye del conceyu y qu’esta cellebración nun tien tradición nel barriu felguerín. Poro, queda demosáu que l’Ayuntamientu nun tien voluntá de dinamizar esta zona de La Felguera y recuperar les fogueres de San Xuan.

Dende Conceyu Abiertu por Llangréu piden que’l gobiernu llocal “recapacite y conceda’l permisu a la xunta hosteleros y comerciantes que pidieron el mesmu pa entamar la foguera San Xuan”. Pa Conceyu “nun tien xaciu qu’argumenten que la cellebración de San Xuan nun tien tradición nel distritu, cuando ye una cellebración, la de les fogueres de San Xuan, tan típica d’Asturies y tolos sos conceyos y pueblos”. Asina, piden que s’autorice la celebración d’esti eventu “pa da-y vida a esti barriu felguerín y por últimu queremos da-y la norabona a los vecinos, hosteleros y comerciantes por tratar de dinamizar Pinín”.