Compromisu llama a nun se resignar y lluchar por una Asturies soberana

Compromisu llama esti 8 de Setiembre a nun se resignar y lluchar por una Asturies soberana y xusta, na voz de Yolanda Huergo, que rescampla que la convocatoria “Asturies Decide” amuesa que dalgo se mueve nuna sociedá cansada col sistema políticu actual.

Yolanda Huergo, como vocera nacional de Compromisu por Asturies, fixo un llamamientu a la ciudadanía pa participar na manifestación “Asturies Decide: Pola soberanía y el cambiu social”, que va salir el domingu 8 de setiembre de la Plazuela San Miguel a les 12:30 hores.

Dende Compromisu rescamplen que “diferentes fuerces polítiques, col sofitu de sindicatos y colectivos sociales, punxímonos a trabayar en comuña p’amosar qu’hai una Asturies que nun se resigna, frente a un gobiernu que’l Día la Nación namás qu’organiza actos festivos, escaeciendo los problemes del país y les nueses reivindicaciones como asturianes y asturianos”.

Compromisu señala qu’“esti 8 setiembre, reclamaremos una Asturies soberana que puea definir les polítiques que precisamos, lo qu’esixe una autonomía financiera cola que nun cuntamos, pa lluchar contra’l desemplegu, l’éxodu masivu la mocedá, l’esfarrape medioambiental y la eliminación de tou elementu cultural que recuerde qu’Asturies tien una identidá propia”.

Pero tamién “por una Asturies xusta, onde los recursos públicos se dediquen a solucionar los problemes de la mayoría social, y non los de la vieya casta de políticos-empresarios que se retroalimenta pa caltenese en poder, que tán penriba la democracia, la llei y que nun tienen de la más mínima vergoña”-

Yolanda Huergo rescampló que “la convocatoria Asturies Decide, amuesa que dalgo se mueve nuna sociedá cansada col sistema políticu actual, y que nun va baxar los brazos frente a los abusos del gobiernu autonómicu, central, européu, nin desi ente que naide vota pero que controla les nueses vides que ye la Troika” remató.