Compromís pide nel Senáu la Oficialidá de la llingua asturiana

El voceru de Compromís nel Senáu, Carles Mulet, pidió esti miércoles na Cámara Alta’l cumplimientu de la Carta Europea de les Llingües Rexonales o Minoritaries no que fai a les llingües del Estáu y pa con ello la oficialidá de la llingua asturiana.

El voceru de Compromís pidía tamién la oficialidá de toles demás llingües que nun son oficiales como l’aragonés y en resume aquello que dispon la Constitución, que nel so artículu 3 fala de la so protección, polo que solicitó “polítiques estatales de protección y respetu escontra estes llingües, garantizando un estatus xurídicu equiparable al castellán, tal como vieno reclamando’l Conseyu d’Europa”. Compromís reclamó por mor d’ello la oficialidá para llingües minoritaries como l’asturianu y l’aragonés.

El senador valencianu utilizó na so intervención la variante lleonésa del asturianu, l’asturianu central y l’aragonés pa reclamar un respetu poles polítiques de normalización llingüística de les comunidaes, collaborar financieramente coles CCAA na so promoción y fomentar planes d’usu y formación d’habilidaes comunicatives nestes llingües del so personal na Alministración Xeneral del Estáu cuando empresta servicios nes mesmes.

Nes cámares de Madri namái Izquierda Xunida y Podemos emplegaron l’asturianu hasta agora, lo que dexa n’evidencia a los demás partíos asturianos que dicen promover l’usu de la llingua de nueso. Mulet recordó na so intervención “la campaña del delegáu del Gobiernu nel País Valencianu que denuncia a los alcaldes en que los sos conceyos retularan en valencianu” y denunció la doble realidá qu’esiste. Denuncien adoctrinamientu, pero ignoren la oficialidá nes autonomíes que tienen llingües propies. Reivindicar la riqueza de les llingües d’España ye reivindicar la pluralidá de cultures y el Grupu Vascu tendría de ser más sensible a un problema d’encaxe qu’afecta a numberosos ciudadanos del Estáu, pos son munches les autonomíes con distintes llingües propies y con llingües ya identidaes que merecen y precisen impulsu dende tolos ámbitos posibles” dixo’l senador de Compromís.

Les enmiendes de la coalición valenciana a la moción de la PNV, que fueron refugaes, reclamaben tamién l’usu de la toponimia billingüe en tolos casos nes víes de la so competencia, facilitar la reconocencia de les especialidaes docentes del profesoráu de llingües protexíes non oficiales en primaria y secundaria y esplegar los medios fayadizos para la enseñanza del llionés nel sistema d’educación públicu d’esa autonomía.