Cine a lluz de la lluna, artes escéniques na cai, conciertos, teatru, danza… asina va ser esti Branu n’Uviéu

by redacción asturnews | julio 9, 2018 8:20 am

El ciclu cultural de beanu n’Uviéu empecipió esta selmana pasada col conciertu del grupu canariu Locoplaya, qu’en llugar de celebrase nel patiu del Edificiu Históricu de la Universidá foi nel Teatru Filarmónica “por condiciones meteorolóxiques”.

El presidente de la Fundación Municipal de Cultura, el conceyal Roberto Sánchez Ramos presentó esti martes pasáu’l Festival de Branu 2018, “una programación fecha pa la ciudadanía y pa tolos que nos visiten pel branu”. El conceyal estimó a los y les trabayadores de la Fundación Municipal de Cultura y a los coordinadores, ente ellos a Pablo de María y al ceador de la cartelería, Ricardo Villoria, el so trabayu y destacó la collaboración de la conceyalía de Marisa Ponga, la d’Atención a les Persones ya Igualdá, de la Universidá d’Uviéu y de la Fundación Ópera.

El branu n’Uviéu va incluyir artes escéniques, teatru, musicales, danza, conciertos o cine a la lluz de la lluna, la mayoría d’actividaes gratuites. La programación d’anguaño inclúi, como una de les novedaes, el “Tour de la víctima”, una iniciativa empobinada pol artista Paco Cao. Del sábadu 25 d’agostu al vienres 7 de setiembre “un serviciu públicu gratuitu va dexar a quien lo deseye faer un percorríu n’autobús, por distintos enclaves del conceyu p’analizar casos de víctimes de naturaleza bien diversa, dende la prehistoria hasta’l presente, rellacionaos con cada llugar y contextualizados históricamente”.

El responsable municipal de Cultura destacó tamién l’apueste por llevar el Branu” a tol conceyu. Asina, el ciclu inclúi actividaes en Olloniego, Tudela Veguín, Cualloto o Trubia”.

Source URL: http://asturnews.com/cine-a-lluz-de-la-lluna-artes-esceniques-na-cai-conciertos-teatru-danza-asina-va-ser-esti-branu-nuvieu/