Portada Educación Cinco empreses asturianes busquen talentos na Universidá d’Uviéu

Cinco empreses asturianes busquen talentos na Universidá d’Uviéu

by redacción asturnews
Universidad Laboral, Gijón: https://en.wikipedia.org/wiki/Universidad_Laboral_de_Gij%C3%B3n#/media/File:Universidad_Laboral_gijon.jpg

Les empreses precisen captar talentos y a los universitarios apúra-yos poner un pie nel mundu empresarial en busca d’una oportunidá llaboral. Nesti binomiu asítiase la segunda edición del programa ‘Sí, somos Innovación’ que por mor d’un conveniu robláu ente’l Conceyu y l’Universidá d’Uviéu texe la so rede sobro l’impulsu a proyectos innovadores.

La Facultá d’Economía y Empresa, nel Campus d’El Cristu, foi l’escenariu onde ayeri se punxo en marcha la segunda edición del programa. Cinco empreses espunxeron distintos retos a los cuarenta y cinco alumnos que s’apuntaron al programa. Problemes reales que los alumnos tendrán de resolver n’ocho sesiones de trabayu.

Liberbank, EdP, Nestlé, Alsa y Supermercaos Más y Más amosaron les cartes por que los participantes xueguen la so propia partida. L’oxetivu ye buscar la solución ideal a problemes reales. «Les empreses en munches ocasiones tamos obsoletas tocantes a idees asina que cuanto más lloques sían, muncho meyor. Nun tengáis mieu», afaló Antonio Fernández Rayón, responsable del Departamentu de Selección y Formación de ALSA, a los estudiantes.

El retu llanzáu por esta empresa punxo’l focu n’ameyorar el serviciu conocíu como Centro Bus, pero hubo más desafíos. Asina EdP, al traviés del so responsable de Proyectos ya Innovación, Enrique Menéndez, afaló a los mozos a llograr un mayor impulsu del vehículu eléctricu. Liberbank barrió pa casa, y pidió-yos analizar qué se-y puede pidir a un bancu pa sacar alantre xuna idea de negociu, propunxo Román Pérez, manager d’Innovación Dixital. Pela so parte, Isabel Velasco, xefa de Producción de Nestlé, llanzó-yos el retu de llograr modernizar la imaxe d’un envase tan tradicional, como la llata, y dende Más y Más, el más difícil inda, averar la pescadería a los mozos, propunxo’l so responsable Comercial, Santiago Pulgar.

La vicerrectora d’Acción Tresversal y Cooperación na Empresa, Eugenia Suárez, esplicó qu’esti programa promueve que los estudiantes trabayen sobro esos retos. «Ye una esperiencia fundamental qu’en munches ocasiones na aula non pudi consiguise». Pela so parte, el conceyal d’Economía y Empléu, Rubén Rosón, destacó’l fomentu del trabayu colaborativo ente empresa y universidá».

Tamién te podria gustar