Portada Sociedá Científicos de la Universidá d’Uviéu cuantifiquen el CO2 qu’absorben les especies más comunes de los bosques atlánticos

Científicos de la Universidá d’Uviéu cuantifiquen el CO2 qu’absorben les especies más comunes de los bosques atlánticos

by asturnet

Un equipu d’investigadores de la Universidá d’Uviéu ellaboró modelos matemáticos que dexen determinar cuánto dióxidu de carbonu pueden absorber los diez especies más comunes nos montes atlánticos. Les conclusiones del trabayu, desenvueltu por Javier Castañu, Pedro Álvarez y Marcos Barriu, acaben de publicase na prestixosa publicación International Forestry Review y dexen a los especialistes establecer unes pautes pa llograr una xestión forestal más eficiente y meyor planiada. El trabayu lleváu a cabu dende’l Grupu d’Investigación de Sistemes Forestales Atlánticos – GIS Forest- (Departamentu de Bioloxía d’Organismos y Sistemes) en collaboración cola Unidá Mista d’Investigación en Biodiversidá del CSIC foi frutu d’un importante llabor de campu nos montes d’Asturies y Galicia mientres dellos años.

Los investigadores llograron establecer modelos matemáticos que, en función de distintos factores, pueden calcular cuántu CO2 absuerbe una masa forestal d’una determinada especie. L’artículu arrexunta les fórmules aplicables a los diez especies más comunes nel noroeste peninsular. Dalgunes d’elles, que s’ellaboraren con anterioridá, fueron reaxustaes y otres hanse calculáu per primer vegada, como nel casu de la castañal (castanea sativa), abeduriu celtibéricu (betula pubescens), haya (fagus sylvatica) y tres especies de carbayu (quercus petraea, quercus pyrenaica y quercus robur).

Pa poder calcular cuánto dióxidu de carbonu absuerbe caúna de les especies, los modelos tienen en cuenta les condiciones ambientales en que se topen los árboles, la densidá del arboláu esistente, la rexeneración qu’esistió na zona o los tratamientos selvícolas aplicaos o plantegaos. Los niveles d’absorción d’una mesma especie pueden variar en función d’estes variables. Les grandes mases forestales d’Asturies y Galicia actúen como importantes sumidorios de dióxidu de carbonu que pueden influyir de manera notable a la d’apangar los efectos del cambéu climáticu.

El Grupu d’Investigación de Sistemes Forestales Atlánticos (GIS-Forest), que dirixe’l doctor Pedro Álvarez, constató que les especies de crecedera rápida, como por casu los ocalitos, pueden actuar como soluciones rápides en casos como cultivos enerxéticos que precisen producir biomasa con rapidez; actuando tamién como eficaces sumidorios de CO2 al curtiu plazu. Sicasí, les especies de crecedera lenta como’l carbayu o la faya, entá teniendo tases de crecedera más baxes, constitúin reservorios mientres más tiempu, polo que son preferibles naquelles condiciones ambientales menos afayadices pa les de crecedera rápida.

Los modelos ellaboraos y les conclusiones alcanzaes nel trabayu faciliten la planificación y xestión de les grandes mases forestales del noroeste yá que tamién establecen el nivel de producción de biomasa de les especies más comunes. Esos datos resulten claves pa tomar de decisiones como definir los llabores silvícolas necesaries en cada zona o determinar qué especie en más fayadiza pa repoblar una área concreta del monte.

Tamién te podria gustar