Ciclu de música clásica nel Teatru Riera de Villaviciosa

El vienres que vien, 7 d’agostu, la Coral Capilla La Torre de Villaviciosa va abrir el ciclu Clásicos del Branu con un conciertu a les 20.30 hores nel Teatru Riera de Villaviciosa.

Van segui-y el sábadu 8 Armando Orbón y Kamal Sabri cola so orixinal propuesta de música fusión de guitarra española y sarangui de la India, nel Teatru Riera a les ocho y media. Les siguientes cites van ser el martes 18 a les 20 hores cola OSP na Ilesia Parroquial, un conciertu que -otru añu- ye posible gracies a Caxastur.

El sábadu 22 va sonar en Villaviciosa el jazz contemporaneu del Quintetu Cova Villegas, a les 20.30 hores, otra vuelta nel Teatru Riera. El pieslle del ciclu toca-y esti añu al recital nel marcu del Festival Internacional de Pianu de Xixón que -la primer vez- celebra ún de los sos conciertos en Villaviciosa, apurriendo al públicu llocal y de fuera la posibilidá estraordinaria de sentir solistes mozos de proyeición internacional, como la pianista Akiko Shirogane. El so conciertu va ser el vienres 28 d’agostu a les 20..30 hores nel Teatru Riera.

El ciclu musical Clásicos del Branu presenta d’esta miente un programa ambiciosu y anováu, con estilos distintos y una calidá curiosa. Tolos conciertos son con entrada llibre hasta enllenar l’aforu.