Ciañu tien abierta la esposición “Una mirada al este”

La esposición Una mirada al este del artista llangreanu Javier Rodríguez Linera va poder visitase na Casa los Alberti de Ciañu (Llangréu) hasta’l xueves 28 d’ochobre. Una Mirada al Este quier amosar la vida n’Ucrania y en Rumanía al traviés d’una mirada interesada y empática qu’afaya la vitalidá de les sos xentes nel día a día. Estes semeyes quieren ser, según esplica l’autor, “un ventanucu abiertu pel qu’entrever a esa familia de llabradores nos montes de los Cárpatos, a esi arguyosu home qu’enseña’l mapa de lo que foi la Gran Rumanía, a eses paisanes que ven pasar el mundu frente al so bancu… Xente que trabaya, que va al mercáu, que charra colos collacios, que fuelga nun parque. Xente normal a lo que-y debo abondo”.

Desque na seronda de 1998 Javier Rodríguez Linera llegara a Lviv, ciudá nel occidente d’Ucrania, surdió nelli un interés especial pol este d’Europa, una zona acabante de dexar de ser l’otru llau del telón d’aceru. Compartir la vida con ellos primero y visitalos dempués, pero con otros güeyos bien estremaos de los del turista, dio como resultáu una colección de fotografíes de les cuales esta esposición ye una amuesa.