Ciañu acueye una esposición dedicada al centenariu del anarcosindicalismu n’Asturies

El Centru de Referencia de la Cultura y la Llingua Asturiana Casa de los Alberti de Ciañu acueye la esposición 100 Años d’anarcosindicalismu n’Asturies. Esta esposición, que va permanecer abierta al públicu dende’l vienres 10 de febreru al vienres 3 de marzu, organízala l’Atenéu Llibertariu de Xixón y cuenta cola collaboración de la CGT y el Conceyu de Llangréu.

La esposición fai un percorríu pela hestoria del anarcosindicalismu n’Asturies, dende los sos empiezos en 1910 hasta agora. Esta muestra, bien documentada, busca poner en valor la importancia d’esti movimientu, tolo que significó pa la llucha obrera y tamién la so faceta educadora. Al traviés d’una selección de prensa, llibros, cartelos y documentos d’archivu, recuerda a los sos protagonistes, evoca la obra anarcosindicalista y recupera la so memoria.

100 años d’anarcosindicalismu n’Asturies permítenos conocer el llabor de los personaxes más importantes del movimientu, tales como Avelino González Mallada, Eleuterio Quintanilla o Ramón Álvarez, ente otros.