China prohibe l’estrenu del nuevu filme de Winnie the Pooh

08 agostu 10:06 2018 Imprimir

Paez ser que China nun siente demasiada devoción por Winnie the Pooh, el entrañable personaxe creáu por Alan Alexander Milne.Y ye que l’estrenu de la nueva película de Disney sobro’l simpáticu osín y los sos amigos, que lleva por títulu Christopher Robin, quedó prohibíu nel país.

La cinta, dirixida por Marc Foster, centrase nun home (Ewan McGregor) que torna de vuelta al monte de los Cien Acres, el llugar onde esfrutó de neñu xuntu al popular osu y el restu de los sos amigos, xusto nun momentu nel que la so vida familiar se desmorona. Esi alcuentru colos sos vieyos amigos llevarálu a solucionar los sos problemes nel trabayu y a afayar de nuevu les coses que merecen la pena de la vida.

L’enfrentamientu qu’esiste ente China y el protagonista de la serie de dibuxos debese a que’l presidente Xi Jinping foi comparáu en diverses ocasiones col osu nuna serie de memes que se viralizaron nes redes sociales y eso nun-y sentó demasiao bien. Tal ye’l bloquéu que ta sufriendo esti personaxe, qu’inclusive les autoridaes asiátiques desamarraron xuna campaña de restricción en blogues y portales online.

La primer vegada que se rellacionó al presidente chinu con Winnie the Pooh tuvo llugar cuando’l mandatariu axuntó con Barack Obama, entós presidente de los Estaos Xuníos. Na imaxe que circuló nes redes sociales comparabase a dambos mandatarios con Winnie y Tiger. Tres este meme siguiríen-y otros más: cuando saludó al primer ministru de Xapón, Shinzo Abe, en 2014 o en 2015, cuando Xi Jinping apaeció nun coche descapotable.

La película protagonizada por Ewan McGregor va llegar a la cartelera española’l próximu 28 de setiembre.

 

  Categories: