Portada Escéniques Celebrase’l Día Mundial del Teatru a telón cayíu

Celebrase’l Día Mundial del Teatru a telón cayíu

by redacción asturnews

Esti próximu 27 de marzu’l mundu enteru va celebrar el Día Mundial del Teatru. Y per vegada primera desque en 1961 institucionalizóse esa fecha, va facese con tolos teatros españoles -y en gran midida del mundu zarraos pola crisis sanitaria del coronavirus.

El cierre forzáu pon al sector, n’eterna crisis, y de manera bien especial a les compañíes asturianes, qu’alverten un mazazu demoledor en tolo que ta pasando. El dramaturgu pakistaní Shahid Nadeem ye l’autor anguaño d’un testu que reclama para’l teatru’l papel de santuariu, d’impulsu, de sacalliñu nestos tiempos confusos. «El teatru tien un papel, un papel noble, debe dinamizar y faer avanzar a la humanidá, ayudar a llevantase primero que caya nun abilsu», dexó escritu’l lliteratu que ve necesariu recuperar la simbiótica relación ente artista y públicu, esi actu sagráu. El potencial tresformador ta ende, esperando’l so momentu.

La escenografía del güei ye la que ye y asina la retrata Escenasturias, l’asociación qu’arrexunta a les empreses de les artes escéniques d’Asturies, qu’ayeri faía públicu un comunicáu en que ponía les sos cartes sobro la mesa y pidía midíes pal sector, empezando por una serie d’actuaciones que atenúen l’impactu económicu de la crisis, como «la conxelación de pagos d’impuestos y seguros sociales, según el pagu de la cuota d’autónomos a la Seguridá Social».

Reclamen que les actuaciones que fueron atayaes nestos díes d’estáu d’alarma nun se pierdan definitivamente, sinón que sían aplazaes y puedan ser recuperaes más palantre. Y que esos aplazamientos nun sían los qu’integren les actuaciones de semestres siguientes; que los unos sumar a los otros.

Tamién te podria gustar