Celaá solivianta a los sindicatos cola propuesta d’evaluar al profesoráu

Celaá solivianta a los sindicatos cola propuesta d’evaluar al profesoráu
12 09:55 2018 Imprimir

La propuesta llanzada’l martes pasáu pola ministra d’Educación sobro la necesidá d’introducir cambeos na formación inicial de profesores y d’establecer un sistema d’evaluación voluntariu sobro’l so desempeñu profesional amestáu a incentivos llaborales soliviantó a la práctica totalidá de los principales sindicatos de docentes del país.

CC OO, CSIF, ANPE, UXT y STEs refarten a Isabel Celaá qu’escoyera un foru d’espertos como fórmula p’abrir un delicáu alderique políticu y social que pretende que desagüe na reforma integral y consensuada del oficiu docente n’España. Pela contra, esíxen-y que convoque darréu la Mesa Sectoral d’Educación, onde se sienten les centrales mayoritaries y el ministeriu, porque aseguren qu’esi ye’l llugar onde hai qu’aldericar, por aciu «una negociación directa», cualquier cambéu qu’afecte a la formación o la carrera del profesoráu y onde debería de presentar en primer llugar cualquier propuesta relevante sobro esta tema.

Tolos sindicatos reclamen que nesa negociación tien d’apautase la ellaboración d’un Estatutu Docente, que regule dende la formación inicial, al accesu a la función pública, la carrera profesional -incluyíes les evaluaciones-, la formación siguida, y otros aspeutos como la xubilación antemanada.

La reacción más dura partió esti xueves de CSIF. El so responsable nacional d’Educación, Mario Gutiérrez, considera que Celaá coles sos palabres «ataca inxustamente la dignidá profesional de los docentes» y que dexa a el profesores españoles «a los pies de los caballos, al dexar entever que nun tán preparaos, que nun s’evalúa o que nun hai control sobro l’exerciciu de la so función docente». Les esixencies de los sindicatos nun coinciden esactamente col percorríu plantegáu’l martes pola ministra pa intentar completar una reforma del oficiu docente. Celaá indicó que quier ellaborar en trés meses una síntesis con toles aportaciones realizaes nel foru polos espertos y coles que dende esi día pueden realizar el profesores al traviés d’internet y les redes sociales, que va ser la base de la propuesta de reforma que va tratar de consensuar  primero qu’acabe la llexislatura cola comunidá educativa, les comunidaes autónomes y los grupos parlamentarios. Esta reforma, según esplicó Celaá, tien de tomar tolos aspeutos del oficiu docente: l’accesu a los estudios, l’accesu al puestu de trabayu y la carrera profesional.

La ministra quixo dexar l’alderique abiertu, pero punxo sobro la mesa delles propuestes. La primera foi establecer dalgún tipu de prueba o requisitu (distintu a la selectividá) p’aportar al grau d’Educación y al máster de Secundaria, porque «hai qu’evitar que s’acabe nesta carrera por avatares de la vida». De segundes, abogó por añedir a los estudios actuales un períodu de formación práctica obligada con profesores tutores antes de recibir la habilitación pa execer como docente. Nun precisó si se refería a treslladar a la educación un sistema similar al MIR de los médicos.

En tercer llugar faló de dos cambeos na carrera profesional. Per un sitiu, establecer evaluaciones voluntaries qu’apurriríen incentivos profesionales. Y por l’otru, afaer la formación siguida a les necesidaes del centru y acutar más xornada llaboral pa la collaboración pedagóxica ente profesores.

  Categories: