Celaá confirma que’l próximu cursu podrá llograse beca con un 5

La ministra d’Educación confirmó esti xueves que los alumnos del primer cursu de los graos universitarios, de Bachiller o FP que cunten con un 5 de nota media van poder aportar a una beca si cumplen colos restantes requisitos de renta familiar esixíos para ello.

Isabel Celaá avanzó que’l decretu d’ayudes al estudiu que nesti momentu ellabora’l so departamentu, y que’l so borrador podría tar termináu para la selmana próxima, va poner fin al endurecimientu de les esixencies académiques para’l llogru de beques que José Ignacio Wert y el PP enllantaron en 2012, cuando alzaron la nota mínima para aportar a les ayudes educatives del 5 al 5,5.

Una vegada que cunte col borrador, la ministra va unviar el testu al Conseyu Escolar del Estáu, por que sía aldericáu polos representantes de la comunidá educativa, y va convocar en curtia una Conferencia Sectorial, para consensualo colos responsables educativos de les comunidaes autónomes,  primero que’l Conseyu de Ministros apruebe’l documentu definitivu qu’el BOE va publicar esti branu.

L’afirmación de Celaá -«volver al 5 ye seguro»- garantiza siquier que dende setiembre los alumnos de primer cursu con un 5 de media van poder aforrase’l preciu de la matrícula. Sicasí, la ministra nun quixo esclariar si’l decretu tamién va abolir l’otru gran cambéu de Wert, qu’esixó a los estudiantes de primeru d’universidá cuntar siquier con una nota media de 6,5 para poder aportar, amás d’a la gratuidá de matrícula, a les ayudes monetaries de la beca (la compensación por renta familiar y, nel so casu, la subvención para agospiamientu y mantención en casu d’estudiar llueñe de la so casa).

Tratase d’una de les promeses del PSOE na oposición, que defendió que nengún estudiante con escasos recursos económicos tenía de dexar de llograr la beca completa si cuntaba con un 5 polo qu’aseguró qu’acabaría tantu col 5,5 como col 6,5. Los socialistes tamién prometieron revertir l’endurecimientu de los requisitos académicos impuestos por Wert para llograr la gratuidá de la matrícula o la beca completa a los alumnos de los segundos y socesivos cursos universitarios, qu’agora, para optar a les ayudes monetaries, tán obligaos a superar hasta’l 85% o’l 100% de los creitos, según les titulaciones.