Cedro bloquia 122 canales de Telegram que piratiaben llibros, revistes y periódicos

El Centru Español de Derechos Reprográficos (Cedro) bloquió 122 canales de Telegram, con más de 380.000 usuarios, nos que se compartíen miles de copies pirates de llibros, periódicos y revistes mientres el confinamientu.

Según informó esta selmana Cedro, énte la medría de la piratería nes aplicaciones de mensaxería instantánea mientres esti periodu de confinamientu, a finales del mes d’abril solicitó a Telegram el bloquéu de más de cientu venti canales onde detectara que se taben compartiendo “de forma intensa” copies ensin autorizar de llibros, periódicos y revistes. Asina, según espliquen, dende va unos díes estes copies ilícites yá nun tán accesibles porque Telegram bloquió estos grupos.

“Nun ye la primer vegada qu’esta aplicación de mensaxería collabora con Cedro na llucha contra la piratería dixital. Sicasí, nunca llegáramos a acabar cola actividá ilícita d’un númberu tan alzáu de grupos, especialmente al traviés de la so versión web, nos que se taben compartiendo copies pirates d’obres de los nuesos socios”, dixo Jorge Corrolades, director xeneral de la entidá.

Amás, según Corrolades, los servicios de mensaxería instantánea, como Telegram o WhatsApp, “cada vez son más utilizaos pa distribuyir y consumir copies pirates de conteníos lliterarios ya informativos”. Y por eso la entidá que lidera intensificó’l llabor de detección d’estes canales y solicitú de bloquéu de los mesmos.

Con esta operación, Cedro quier demostrar que l’ésitu na llucha contra la piratería aniciase “na collaboración de los distintos axentes implicaos, como asocedió entre Telegram y la nuesa asociación”, y por eso esperen que “sirva d’exemplu” pa trabayar nesta llínea con tolos operadores de serviciu y plataformes d’internet.

Coles mesmes, Corrolades destacó que’l sector editorial ye “estratéxicu” pa España, “tanto pola so dimensión cultural y educativa como pola so aguada económica y xeneradora de puestos de trabayu”, y manifestó el so enfotu en qu’ente toos se consiga que la piratería dixital “nun suponga un llastre pa la cadena del llibru y les publicaciones periódiques”