CCOO denuncia la precariedá del profesoráu de llingua asturiana

CCOO denuncia la precariedá del profesoráu de llingua asturiana
17 setiembre 12:53 2020 Imprimir

El sindicatu d’enseñanza de Comisiones Obreres d’Asturies vieno acabante denunciae la precariedá del profesoráu de primaria de llingua asturiana, nuna situación qu’añu tres d’añu se repite nes convocatories d’interinidaes pal cursu.

Una vez más, Comisiones quier denunciar el mou como se planificó la ufierta de places de Llingua Asturiana nes convocatories d’interinidaes pa esti cursu. N’Educación Primaria, el númberu de medies xornaes sigue suponiendo alredor del 80% de los contratos. La desplicación d’esta denuncia vese nos cuadros de places convocaes y alxudicaes que se reproducen darréu:
PRIMERA AXUDICACIÓN LLINGUA ASTURIANA PRIMARIA CURSU 2020/2021
No TOTAL DE PLACES: 185
COMPLETES: 38 (20,54%). 16 son itinerantes. MEDIES: 147 (79,45%). 10 son itinerantes.
SEGUNDA CONVOCATORIA LLINGUA ASTURIANA PRIMARIA CURSU 2020/2021
No TOTAL DE PLACES: 7
COMPLETES: 2 (28,5%). D’estes, 1 ye itinerante.
MEDIES: 5 (71,4%).
…………………………………
PLACES D’EDUCACIÓN PRIMARIA CON LLINGUA ASTURIANA No PLACES: 24 (TOES COMPLETES Y TOES ELLES PLACES COVID)
PLACES DE LA BOLSA DE LLINGUA ASTURIANA UFIERTAES ENDAGORA (11/09/2020)
No TOTAL DE PLACES: 192 COMPLETES: 40 (20,83%) MEDIES: 152 (79,16%).

Sigún desplicaba esti día’l sindicatu nuna nota de prensa, “la convocatoria del 11 de setiembre inclúi 24 places completes d’Educación Primaria con hores de Llingua Asturiana, que se presenten como places COVID (places convocaes como resultancia de la reducción de la ratio d’alumnáu per aula). Hai que precisar qu’esta ufierta fízose na segunda convocatoria, cuando les más de les places d’Asturianu a media xornada yá taben axudicaes, y que les persones de la bolsa de Llingua Asturiana que nun formen parte de la llista d’Educación Primaria nun pudieron pidiles. Les places COVID, d’otra miente, tán suxetes a les necesidaes organizatives: nel casu de qu’hubiera que trancar el centru por razones sanitaries podríen cesar al profesoráu contratao”.

La situación del profesoráu de Llingua Asturiana ye enforma precaria pal sindicatu, como amuesen estos datos: “Son, na mayor parte los casos, trabayadores temporales que nun tienen la posibilidá de presentase a oposiciones, darréu que la Llingua Asturiana nun tien reconocida la especialidád docente. L’abusu de les contrataciones a media xornada agrava la precariedá de les sos condiciones llaborales, ya qu’estes places suponen unos ingresos d’alredor de 800 euros al mes ya impliquen davezu desplazamientos o cambios de residencia”.

La inestabilidá llaboral del profesoráu d’Asturianu nun permite, sigue diciendo la denuncia pública de CCOO y “como yá denunciemos munches vegaes, l’afitamientu de l’asignatura nos centros educativos. El Sindicatu d’Enseñanza de CCOO d’Asturies lleva años reclamando la creación d’una especialidá docente de Llingua Asturiana col envís de dotar a los centros de personal fixo. Mientres tanto, ye preciso establecer los mecanismos necesarios pa evitar la precarización del emplegu, garantizando una enseñanza de calidá”.

  Categories:
Loading Facebook Comments ...