Cataluña encabeza’l ranking d’universidaes españoles a nivel mundial

Cataluña encabeza’l ranking d’universidaes españoles a nivel mundial
26 xunetu 09:05 2018 Imprimir

Les universidaes catalanes, les ocho públiques y cuatro privaes, son les que más vegaes apaecen clasificaes nel Ranking de Shanghái de disciplines académiques del 2018, un total de 145 ente les dolce instituciones, per delantre de los centros de la Comunidá de Madrid (115) y Andalucía (95).

Asina lo reflexa’l ranking de la Universidá Jiao Tong de Shanghái, unu de los más reconocíos a nivel mundial y qu’entama por orde d’excelencia más de 4.000 universidaes ente 54 materies académiques, que se distribúin de la mesma en cinco árees: Ciencies Naturales, Inxeniería, Ciencies de la Vida, Ciencies Médiques y Ciencies Sociales.

La llista, que nun recueye datos de les carreres d’Humanidaes, establez cinco criterios pa ellaborar la so clasificación: el númberu d’artículos publicaos, el porcentaxe de cites, les apaiciones en, siquier, dos revistes internacionales, la presencia en revistes de prestíu y el númberu d’investigadores premiaos.

Asina, Cataluña ye la comunidá con mayor númberu d’apaiciones nel llistáu de Shanghái, un total de 145 partíes ente dolce instituciones, siguida pola Comunidá de Madrid, con 115 ente ocho universidaes y per Andalucía, con 95 ente otros ocho centros.

De siguío ta la Comunidad Valenciana, con siete universidaes qu’apaecieron hasta 71 vegaes na clasificación; Galicia, con 33 apaiciones de les sos trés universidaes públiques, y Aragón, gracies a les 26 materies nes que sobresalió la Universidá de Zaragoza.

Nesti sentíu, la Universidá de Barcelona ye la institución española que más vegaes s’asitió n’una de les 54 disciplines analizaes, un total de 38 (n’once ocasiones foi la primera), per delantre de la Universidá Complutense de Madrid y la de Granada (35 caúna) y l’Autónoma de Barcelona (33).

Siguen la clasificación la Universidá de Valencia (30), la de Sevilla (28), la de Zaragoza y l’Autónoma de Madrid (26), y asina hasta un total de 52 universidaes españoles, 47 d’elles públiques y 5 privaes, qu’apaecen llistaes nel ranking.

Ente los meyores puestos d’España a nivel mundial destaquen el quintu llugar n’Inxeniería Civil, el primeru de tola Unión Europea, que s’imparte na Universidá Politécnica de Madrid; el séptimu puestu d’Inxeniería Marina de la Universidá de Cantabria y el novenu de Veterinaria na Universidá Autónoma de Barcelona.

Otra disciplina na qu’España ye piquera ye la de Tecnoloxía de los Alimentos, carrera na que cinco universidaes apaecen ente les 50 meyores a nivel mundial, d’un total de 300. Ye’l casu de la Universidá de Valencia, qu’ocupa’l puestu 25 en Tecnoloxía de los Alimentos; la Universidá Politécnica de Valencia, nel 26; la Universidá de Granada, nel 38, la Universidá de Lleida, nel 41; y, a lo último, la Universidá de Sevilla, nel 47.

Amás, d’ente les 500 meyores universidaes del mundu con una especialización n’Agricultura, 35 son españoles, polo que se convierte asina na disciplina con un mayor númberu de centros del nuesu país. Otra manera, nengún centru universitariu apaez ente los 200 meyores del mundu en Derechu, única disciplina ensin representación dalguna d’España.

Y solo cuatro universidaes públiques quedáronse fora de la clasificación de Shanghái: la d’Huelva, la Internacional d’Andalucía, la de Burgos y la Internacional Menéndez Pelayo, que nun consiguieron asitiar nenguna de les sos disciplines ente los meyores.

Tocantes a les privaes, namái cinco de les 32 qu’hai n’España tán ente los meyores d’este ranking, encabezaes pola Universidá de Navarra, con 12 apaiciones; la Universidá Ramón Llull, con 3; y l’Universidá CEU Cardenal Herrera, la Universidá Internacional de Cataluña y la IE University, con 1. La clasificación tamién cunta cola presencia de dos escueles de negocios catalanes: la Escuela Cimera d’Alministración y Dirección d’Empreses (ESADE) y la Barcelona Graduate School of Economics, con dos y xuna disciplines destacaes nel llistáu, respectivamente.

  Categories: