Casi un millón d’españoles participaron nel programa Erasmus nos postreros 30 años

Un total de 952.100 españoles participaron nel programa européu Erasmus desque fuera inauguráu en 1987, añu nel qu’España unvió a 95 estudiante, sigún se supo depués de que’l xueves 13 de xunetu, la Comisión Europea conmemorara na so see de Madrid el 30º aniversariu d’esta iniciativa internacional de la que se beneficiaron nueve millones d’europeos.

La celebración consistió na proyección gratuita de la película ‘Júlia Ist’, que narra con maestría l’aventura ERASMUS n’Alemaña de la so propia directora, Elena Martín. Decenes de mozos españoles esfrutaron de la película, dempués de soplar una tarta de cumpleaños col voceru de la CE n’España, Dimitri Barua, y los protagonistes de la película recién estrenada.

Representantes de la Comisión sorrayaron que’l programa Erasmus ye “unu de los grandes ésitos de la Unión Europea”, gracies al cual miles de persones cada añu tienen la oportunidá de “vivir una esperiencia enriquecedora, d’espandir les sos mentes, d’ampliar les sos fronteres culturales y tamién de preparar meyor pa un mundu llaboral cada vegada más internacional”.

Coles mesmes, recordaron que’l compromisu con esta iniciativa ponse de manifiestu nel presupuestu de casi 15.000 millones d’euros aprobáu pa Erasmus+ hasta 2020,  coles mires d’ampliar el programa al mayor númberu de mozos y de que sía más accesible. Amás, recordaron qu’el 46% de los estudiantes beneficiarios vienen de families ensin estudios.

Según los últimos datos de la Unión Europea, en 2015 hubo 678.000 participantes n’Erasmus + con una ayuda media mensual de 281 euros. Como n’años anteriores, los trés países de los que salieron más estudiantes siguen siendo Francia (39.985), Alemaña (39.719) y España (36 842) y los que reciben un mayor númberu d’estudiantes son España (42.537), Alemaña (32.871) y el Reinu Uníu (30.183).