Casi un centenar d’actividaes ufrense pa pasar el branu n’Uviéu

Casi un centenar d’actividaes ufrense pa pasar el branu n’Uviéu
17 xunu 09:02 2019 Imprimir

El FestivalVeranOVD19 qu’inclúi cine a la lluz de la lluna, visites teatralizadas, artes escéniques, danza, folclore  y, en total cásique un centenar d’actividaes pa pasar el branu n’Uviéu… foi presentáu esta selmana pasada polos conceyales en función Roberto Sánchez Ramos, Marisa Ponga y Mercedes González.

El conceyal en funciones de Cultura, Roberto Sánchez Ramos; la conceyala d’Atención a les persones ya Igualdá en funciones, Marisa Ponga y la conceyala d’Educación y Deportes en funciones, Mercedes González presentaron esta selmana la programación del Festival de Branu, “un programa bien estensu para ciudadanos y ciudadanes de 9 a 99 años que toma tol conceyu, con una inversión que’l pueblu d’Uviéu fixo al traviés d’estes conceyalíes de 250.000 euros, IVA incluyíu”, casi un centenar d’actividaes.

Sánchez Ramos aseguró que l’oxetivu del ciclu “ye acabar, gracies a esta programación, cola idea de qu’Uviéu en xunetu y agostu sía una ciudá d’éxodu ensin actividaes culturales”, apurriendo “una ufierta d’ociu para aquellos uvieinos que nun puedan dise de vacaciones … para esti mundu que nun apaez y que sabemos qu’esiste “, aseguró.

El Festival de Branu va incluyir distintes localizaciones. El claustru del Muséu Arqueolóxicu d’Asturies va acoyer trelce conciertos de cámara, del 14 de xunetu al 29 d’agostu, toos a les 20 hores. A estes presentaciones sumaránse otros tres recitales nel Palaciu Conde de Toreno ( 6, 7 y 19 d’agostu) y un cuartu na Ilesia de Santa María La Real de La Corte’l 13 d’agostu, toos gratis. Los teatros Campoamor y Filarmónica, el teatru Casín de Trubia o’l Centru Social de San Cloyo, tamién van acoyer bona parte de les actividaes d’esti ciclu. Amás, nel Paséu del Bombé, tolos xueves de branu la Banda de Música Ciudá d’Uviéu.

El festival de branu va incluyir actuaciones de bandes y grupos tradicionales, el “Folclore na cai” les fines de selmana, y la danza tamién va tar presente con dos actividaes los díes 5 y 9 d’agostu nel Teatru Campoamor y entrada llibre. Amás programóse un simposio internacional sol títulu ‘Uviéu, Asturies y el monacato reformáu nel so contestu peninsular y européu’ los díes 2, 3 y 4 de setiembre.

Como n’ediciones anteriores, el Conceyu entamó’l ciclu ‘Cine a la lluz de la lluna’, col que se van ufiertar 32 pases de películes como ‘Sabrina’, ‘Campeones’, ‘Asesinatu nel Orient Express’, o ‘Almuerzu con diamantes’. Los pases van ufiertase na Plaza de la Constitución, Cualloto, la Fábrica d’Armes, Les Campes, Ciudá Naranco, Olloniego, Trubia, La Llosa de Renfe, Oteru, La Corredoria, La Florida, Ventanielles, Pumarín y Tudela Veguín.

  Categories: