Casi 850 estudiantes entamen na Universidá Popular Uvieina

El teatru de Pumarín va acoyer los díes 11 y 12 de payares les Xornaes de presentación de la Universidá Popular Uvieina’ p’averar el proyectu a tolos vecinos y vecines y conocer les necesidaes educatives de los barrios y les propuestes del alumnáu.

Nel segundu trimestre va ampliase la ufierta formativa y los llugares de impartición de los cursos. La matrícula volverá abrir a finales de noviembre.

Dende’l vienres, el teatru Pumarín va acoyer les Xornaes de presentación de la Universidá Popular Uvieina’ nes que se va averar a la ciudadanía l’espíritu d’esti programa educativu como un axente tresformador de la cultura, educación, participación ciudadana y de dinamización de los barrios. Según sorrayó la conceyala d’Educación, Merced González, esta cita va sirvir por que la Universidá Popular  Uvieina, que collechó un  gran ésitu con 847 alumnos matriculaos y 63  persones en llista d’espera nos 22 cursos ufiertaos nel primer trimestre, siga avanzando, teniendo en cuenta les necesidaes formatives de los barrios según les propuestes de meyora de los alumnos.

Les xornaes, que van tar abiertes a tol públicu, van sirvir tamién p’averase a les esperiencies d’otres ciudaes como Xixón, Avilés y la Rioja, según l’andadura de la Federación Española d’Universidaes Populares.  El programa del sábadu va arrincar cola conferencia d’Antonio Moreno titulada “Educación, cultura y participación ciudadana al traviés de la Universidá Popular”, pa darréu celebrar meses redondes nes que se van conocer les necesidaes educatives de los barrios y propuestes de los asistentes.

A finales d’esti mes abrirase’l plazu de matriculación pal segundu trimestre de la Universidá Popular Uvieina, con una ufierta formativa que va siguir ampliándose con cursos como Llingua de Signos Española, Derechos Humanos, ortografía y edición de vídeu, ente otres materies. Según González ta trabayándose pa poder ampliar los llugares de impartición según doblar los horarios pa que los alumnos puedan escoyer ente mañana y tarde.