Portada Entrevista de la selmana Carlos Suari: “Absolutamente tolos xuegos tradicionales tán en peligru y nun hai apoyu dende les instituciones”

Carlos Suari: “Absolutamente tolos xuegos tradicionales tán en peligru y nun hai apoyu dende les instituciones”

by asturnet

Carlos Suari tien un par de poemarios nel mercáu, dalgunos cuentos espublizaos… pero si por dalgo ye conocíu ye pola so actividá nel campu del deporte, o como él prefier dicir, l’espor. Llicenciáu en Ciencies de l’Actividá Física y del Deporte con estudios n’Antropoloxía Social y Cultural, ta consideráu etnógrafu especializáu nel patrimoniu lúdico-motor y la so aplicación a la enseñanza. Ye’l responsable d’un de los proyectos más fondos fechos alredor del mundu del bolu l’“Atles de los Bolos Asturianos”, de la recuperación como deporte del liriu y d’otros proyectos nel campu de los xuegos tradicionales. Amás, Suari presenta los programes “Al aldu: A galmiaes” na TPA, y “¡Acuto!” na RPA. D’estes y d’otres cuestiones falamos con él na Entrevista de la selmana d’Asturnews.

-En 2009 impulsó la creación del Campionatu Nacional del Liriu, un xuegu tradicional asturianu convertíu yá en deporte. Anque un añu ye poco pa ver la evolución, ¿en qué momentu ta agora esta modalidá?

-El Conceyu Nacional de Liriu (CNL) ye un conceyu d’asociaciones o clubes que xueguen y compiten nuna modalidá de les permunches qu’hai de xuegos de liriu n’Asturies, concretamente, el liriu de carreres. Anguaño’l CNL ta compuestu por cinco clús, lo que supón un númberu d’esportistes superior a 40. L’añu pasáu yeren namás trés clús y alredor de venti persones, conque la medría ye evidente. Esto no cuantitativo, porque no cualitativo podríemos falar d’un mayor impactu social, una universalización n’edaes y sexos de los practicantes y sobre too una creciente llista d’oportunidaes de difusión que van dende lo estrictamente esportivo a les estayes más lúdiques de la sociedá.

-Los equipos esistentes anguaño tienen previsto formalizar una federación, ¿qué pasos falten pa llegar a configurala?

-Dende esa estaya más puramente esportiva de la que-y falaba, la constitución d’una federación qu’acueya esta y otres modalidaes afines, ye un oxetivu pal plazu mediu. De les cinco entidaes que formen el CNL trés yá tienen o tán en camín de tener tolos predicamentos que la llei esportiva pide pa formar una federación, y son xusto trés componentes los que la llei pon como mínimu pa esti procesu. Asina que col espoxigue qu’aguardamos pa esti añu ye más que probable que pa la temporada qu’entra podamos sentanos a falar, cuento que pa entós yá taremos bien perriba de los mínimos.

-¿Ta recibiendo dalgún tipu d’apoyu de l’Alministración l’esporpolle d’esti deporte tradicional?

-Absolutamente nengún, y aprovecho pa dicir que l’añu pasáu pidióse collaboración a dos conceyalíes que teóricamente tán dirixíes con sensibilidá asturianista, la de Cultura d’Uviéu y la de Cultura Tradicional de Xixón. Les dos contestanon colo mesmo: silenciu. Ye una cosa que nun soi a entender, el costu d’estes actividaes ye anecdótico y los resultaos y la participación vienen siendo persatisfactorios, asina que de verdá que nun entiendo esta negación cuando incluso tamos facilitándo-yos la vida con estes propuestes. Conceyos más pequeños como Illas o Castrillón si tuvieron bona actitú pa col liriu dende la so humildá.

-¿Ye xeneral esta falta de sofitu institucional a los xuegos y deportes tradicionales?

-Sí, y si quier fáigo-y la radiografía de cómo ta’l tema, entamando peles federaciones más venceyaes a la tradición. La Federación Asturiana de Deportes Tradicionales, fracasada nel so plantiamientu de querer mecelo too como si hubiera que facer el requexu del espor tradicional, agora mesmo ta intervenida por asuntos mui fedientos ensin que’l Principáu faiga nada por rescatala. La Federación Asturiana de Bolos sigue superada dafechu pol so altísimu volume d’actividá ensin que naide-y eche un gabitu. La Dirección Xeneral de Deportes por nun facer nin copia de lo que yá ta en marcha en munchos otros sitios, lléase investigación y formación de cuadros, lléase planes de promoción del xuegu tradicional como actividá saludable, pero tamién como patrimoniu -y ehí tendría de falar d’otra Dirección Xeneral dependiente de Cultura-. Per otra banda, los conceyos nun acaben de facer una defensa decidida dende les sos conceyalíes y patronatos municipales, ensin construir instalaciones, ensin volver los xuegos a la cai. Y too esto y quiero sorrayalo, contando que falamos d’unos gastos que daríen la risa al llau d’otros a los que tamos mui avezaos, too esto contando tamién que falamos d’unos resultaos potencialmente pernutritivos pa la sociedá asturiana.

-Va delles selmanes presentaba los primeros resultaos del so estudiu “Atles de los Bolos Asturianos”, ¿cuándo vamos poder lleer el trabayu completu y qué sorpreses vamos atopar?

-Nun soi a falar de plazos, porque l’asoleyamientu del trabayu depende muncho de lo qu’acabo de comenta-y. Lo que sí puedo dici-y ye que va tener trés partes, un ensayu nel que quiero volcar la parte más personal, el patrimoniu que me tresmitió la xente qu’entrevisté pa la investigación, una segunda a mou de guía con toles modalidaes atropaes y una tercer parte de mapes que reflecten dalgunes conclusiones etnolóxiques.

-¿Cuerren peligru de desapaecer los bolos?

-Munches de les modalidaes qu’atropé yá morrienon, conque namás podríemos resucitales. Otres tán a piques d’ello pol avieyamientu y la perda poblacional, y namás les versiones institucionalizaes, o seya, federaes, d’estos xuegos tienen una vitalidá como pa pensar que puedan siguir p’alantre.

-¿Qué habría facese pa evitar el desaniciu d’un deporte tan importante n’Asturies?

-Federar estos xuegos nun ye la única solución y tampoco nun se fai bien siempre. Pémeque lo ideal ye ser mui fiel a los informantes, facer materiales didácticos y divulgativos con esos datos y a partir d’ehí garantizar la so presencia digna y útil na enseñanza. Otro mui importante ye volver eses manifestaciones a la mesma xente de los pueblos, faciéndo-yos entender que son poseedores de dalgo valiosísimo, único y fráxil, dalgo qu’incluso va ser un atractivu pa que vayan visitalos. Toi alcordándome de Villaicabo, n’Allande, au, atreveríame a dicir que, una placa que desplica’l xuegu d’aquel pueblu ye güei’l so “monumentu” más valoráu polos vecinos.

-¿Qué otros deportes o xuegos tradicionales cuerren peligru en mayor midida?

-Absolutamente tolos xuegos tradicionales tán en peligru de desapaecer. L’inminente desaniciu de la nuesa motricidá lúdica ye una amenaza dende’l mesmu día que franció la cadena de tresmisión xeneracional, el día en que los pueblos yá nun ficieron otro qu’avieyase y el día en que les ciudaes y les villes dexaron de tener el so espaciu natural pal xuegu, la cai. Tengo pa min que más d’un 80% de les asturianes y los asturianos menores d’edá desconocen dafechu’l nuesu patromoniu o nun lu tienen como dalgo propio. Un alumnu míu de 16 años dicíame esti día que los únicos bolos que conocía yeren los del bowling americanu, pero lo más gordo ye qu’él llamábalos “los bolos d’equí”, esto ye, los que’l siente como propios. ¿Conclusión? Qu’enxamás tuvo nuna bolera de “les d’equí” y que nes permunches vegaes que tuvo na del Parque Principado naide nun-y desplicó a qué taba xugando.

-L’añu pasáu convertíase nel profesor d’un cursu pa formar a monitores en xuegos tradicionales en Xixón, ¿va tener continuidá la iniciativa?

-De dalguna manera habría tenela porque nesa experiencia vimos que yera dalgo demandao. El cursu foi obra de la Tertulia Cultural El Garrapiellu que lluchó hasta tener un mínimu sofitu institucional que lu fixera viable. La pena ye que tengamos que ser asociaciones o persones les que rompamos la cara o vayamos a los despachos como’l que viende curriverases. Yera mui cenciello facer unos planes de formación, homologalos y sacar fornaes d’animadores, monitores, etc.

-Dende va cuasi trés años presenta ún de los pocos espacios n’asturianu de la TPA, nel que tienen espaciu los deportes y xuegos tradicionales, ¿qué podría facese pa fomentar estes modalidaes dende los medios de comunicación públicos?

-Les retresmisiones de bolos tán ente lo más esitoso que fixo la cadena, asina que poco costaba siguir enanchando esi camín. D’otra banda paezme que falta divulgación, desplicar a la xente los nuesos xuegos y deportes pa evitar parte d’esi escaezu. Y finalmente, creo que como tolo que se quier recuperar o dignificar, fai falta facelo dignamente visible y tresversal, ye dicir, qu’apaeza dende nos informativos hasta nos programes infantiles.

-¿Qué opina de la presencia que tien l’asturianu na RTPA?

-El tiempu cuerre que se mata, y equí naide nun cuerre nin se mata pol asturianu. Toi cafiáu dafechu con esti asuntu. Nun s’entiende qu’entá nun tenga sitiu nos informativos, nun s’entiende que nun se tean moviendo los doblaxes de películes y series, nun s’entiende qu’emitamos les mesmes retresmisiones esportives que la competencia na mesma llingua de la competencia, nun s’entiende que nun heba un triste programa nuna hora decente de la selmana, nun s’entiende que los topónimos nun acaben de ponese bien, nun s’entiende que nun heba un presentador que los pronuncie… nun entiendo nada nin sé qué oxetu tien tanta necedá.

-Volviendo a la cuestión del liriu, los interesaos n’averase a conocer esti deporte, ¿cuándo tienen la próxima cita y quién y cómo pue participar?

-Informarán los collacios de la Escuela de Música Tradicional de Noreña, pero creo que va ser na villa condal el domingu día 18. Y como siempres, tol mundu ta convidao.

Tamién te podria gustar