Carlos Alba ‘Cellero’ llega al Filarmónica d’Uviéu esta fin de selmana

El célebre monologuista Carlos Alba ‘Cellero’ va actuar el próximu vienres y sábadu nel Teatru Filarmónica d’Uviéu. Nel espectáculu, que va celebrase los dos díes a les ocho y cuartu la tarde, el vienres va presentar los monólogos del so llibru ‘Del chigre’, monólogos actuales n’asturianu.

El sábadu va ser el momentu p’Alonsomanía, dellos monólogos del autor alredor del fenómenu de Fernando Alonso. Amás, diz Carlos Alba, “aprovechando qu’esta selmana fai cinco años del tema del Prestige, el vienres recuperare´l monólogu sobre´l galipote, amás d´otros comentarios sobre los borbones y el so ‘¡¡te quieres callar!!’, los Macan y Madeline, etc…

El sábadu dase la circunstancia de qu’Alonsomanía va coincidir cola manifestación pola oficialidá del asturianu, que va entamar a les 18 hores. A lo que Carlos Alba añade “O seya, primero mani y dempués teatru…”.