‘Cantar presta muncho’ celebra la edición de la pandemia con un vídiu coleutivu

23 xunu 13:27 2020 Imprimir

Un vídiu pon puntu final a la octava edición de Cantar presta muncho, una actividá que cumplía so octava edición y que nesti casu partió del cancioneru tradicional asturianu y de música más moderna como referencia inicial pa desenvolvese cola participación de venti escueles.

“Cantar presta muncho” ye una activida que la Oficina de normalización Llingüística del Conceyu de Xixón punxo en marcha va siete años, pa favorecer la creación de coros nes escueles de Xixón y que los escolinos y escolines del conceyu s’averen a la música coral y tradicional.

Esti proyeutu tien l’envís d’averar a los escolinos y escolines del nuestru conceyu a la música coral d’una manera cenciella, abierta, activa y participativa. La idea ye ufiertar el proyeutu a tolos colexos d’Educación Primaria del conceyu de Xixón, a los que yá tienen coru escolar y a los qu’ensin tenelu-yos abulta interesante la propuesta.

El músicu Nacho Fonseca asesoró al profesoráu que participó en “Cantar presta muncho” pa que foran quien a desenvolver los conteníos propuestos de la meyor manera posible.

Nesta octava edición de Cantar presta muncho, partióse del cancioneru tradicional asturianu y de música más moderna como referencia inicial. Los coros contaron con material d’apoyu al desarrollu de l’actividá nos centros: esto ye con un cancioneru que recueye 70 cantares tradicionales y modernos (lletra, partitura y discu con bases musicales).

Les escueles apuntaes yeren 20 y como nun se pudo celebrar l’actu final de los conciertos nel teatru Xovellanos, dellos de les maestres y maestros participantes grabaron esti videu con lletra y música de Nacho Fonseca, fechu n’esclusiva pa esta actividá.
“Que venga Xovellanos”.

  Categories:
Loading Facebook Comments ...